सरकारले देशभरका सबै सरकारी निकायका आधिकारिक वेबसाइटमा वैध एसएसएल/टीएलएस प्रमाणपत्र जडान गर्न निर्देशन दिएको छ। प्रधानमन्त्री तथा मन्त्रिपरिषद्को कार्यालयअन्तर्गत रहेको राष्ट्रिय साइबर सुरक्षा केन्द्रले परिपत्र जारी गर्दै यस्तो निर्देशन दिएको हो। वेबसाइटको साइबर सुरक्षा बलियो बनाउन र प्रयोगकर्ताका विवरण सुरक्षित राख्न तोकिएको सुरक्षा मापदण्ड अनिवार्य रूपमा लागू गर्न केन्द्रले आग्रह गरेको छ।
केन्द्रले सबै मन्त्रालय, आयोग, सचिवालय, प्रदेशका मन्त्रालय र स्थानीय तहलाई मातहतका वेबसाइटमा प्रयोग भइरहेका प्रमाणपत्रको वैधता तत्काल जाँच गर्न भनेको छ। प्रमाणपत्र नभएका वा म्याद सकिएका वेबसाइटमा आधिकारिक निकायबाट वैध प्रमाणपत्र जडान गर्न र आवश्यक कन्फिगरेसन मिलाउन पनि निर्देशन दिइएको छ।
निर्देशनअनुसार सरकारी वेबसाइट सुरक्षित सञ्चार माध्यम एचटीटीपीएसमार्फत मात्र सञ्चालन गर्नुपर्नेछ। वेबसाइटमा टीएलएस १.२ वा टीएलएस १.३ प्रोटोकल मात्र प्रयोग गर्नुपर्ने व्यवस्था गरिएको छ। पुराना तथा असुरक्षित एसएसएल, टीएलएस १.० र टीएलएस १.१ प्रोटोकल पूर्ण रूपमा निष्क्रिय गर्न पनि भनिएको छ। प्रमाणपत्रको म्याद सकिनुअघि नै नवीकरण गर्ने व्यवस्था मिलाउन र त्यसलाई उच्च प्राथमिकतामा राख्न सम्बन्धित निकायलाई आग्रह गरिएको छ।
