पोखरा महानगरपालिकाले गठन गरेको छानबिन समितिले कालिका बोर्डिङ स्कुलको बस दुर्घटनाबारे आफ्नो प्रतिवेदन बुझाएको छ। प्रतिवेदनमा गाडीमा देखिएको प्राविधिक समस्या र चालकको लापरबाही नै दुर्घटनाको मुख्य कारण भएको उल्लेख छ।

घटना असोज २३ गते भएको थियो। माझठानाबाट विद्यार्थी लिएर कालिका बोर्डिङ स्कुलतर्फ जाँदै गरेको बस पोखरा महानगरपालिका–२८, ओख्लेमा भीरबाट खसेको थियो। दुर्घटनामा ६ जनाको मृत्यु भयो भने केही विद्यार्थी घाइते भए। घटनापछि महानगरले वरिष्ठ शिक्षा अधिकृत बद्रीनाथ सुवेदीको संयोजकत्वमा पाँच सदस्यीय समिति बनाएको थियो।

समितिका अनुसार दुर्घटनामा परेको बस विद्यालयको आफ्नै नभई भाडामा चलाइएको थियो। २०८२ पुसमा बसको नवीकरण हुँदा अनिवार्य प्राविधिक जाँचपास नगरिएको भेटिएको छ। चालक तुलबहादुर गुरुङ विद्यार्थी लिन ढिलो पुगेका कारण बस तीव्र गतिमा चलाएको बयानका क्रममा खुलेको छ। तीव्र गतिका कारण बसको बायाँ पाङ्ग्रा सडकको होचो किनारतर्फ झरेको थियो। चालकले स्टेरिङ बायाँ मोड्न खोज्दा नसकेपछि नियन्त्रण गुमेको र बस भीरमा खसेको समितिले जनाएको छ। सडकको सतह ठिकै भए पनि उकालो र घुम्ती भएको ठाउँमा छेकबार आवश्यक रहेको सुझाव दिइएको छ।

३० सिट क्षमताको बसमा चालकसहित १९ जना मात्र सवार थिए। समितिले विद्यालय यातायात सुरक्षित बनाउन नवीकरणका बेला अनिवार्य प्राविधिक जाँच र बिमा कागजात हेर्नुपर्ने, स्कुल बस निर्देशिका पूर्ण रूपमा लागू गर्नुपर्ने तथा चालकको नियमित स्वास्थ्य परीक्षण र योग्यता प्रमाणीकरण गर्नुपर्ने सुझाव दिएको छ। प्रत्येक सवारीमा जीपीएस र सीसी क्यामेरा जडान गर्ने, मर्मतसम्भारको छुट्टै अभिलेख राख्ने, छुट्टै कार्यविधि बनाएर नियमित अनुगमन गर्ने र चालक, परिचालक तथा विद्यार्थीको अनिवार्य दुर्घटना बिमा गर्ने सुझाव पनि प्रतिवेदनमा छ।