समुद्रमा बसेर विश्व घुम्ने सपना बोकेका दुई सयभन्दा बढी यात्रु कम्बोडियाको बन्दरगाहमा जहाज छाड्न बाध्य भएका छन्। अमेरिकी कम्पनी भिला भि रेजिडेन्सेसले सञ्चालन गरेको ओडिसी नामको आवासीय पानीजहाजले इन्धनको मूल्य अस्वाभाविक रूपमा बढेपछि आफ्नो विश्वयात्रा कम्बोडियामै रोकेको हो।
ओडिसी अक्टोबर २०२४ मा उत्तरी आयरल्यान्डको बेलफास्टबाट निस्किएको थियो। सात महादेश घुम्ने गरी योजना बनाइएको यो यात्रामा यात्रुहरूले जहाजभित्रै घर किनेर वा भाडामा लिएर लामो समय बस्न सक्ने व्यवस्था थियो। कम्पनीका अनुसार यसअघि प्रतिक्याबिन मासिक इन्धन खर्च औसत एक हजार आठ सय अमेरिकी डलर हुन्थ्यो। इरान युद्धका कारण एसियाका कतिपय भागमा त्यो खर्च बढेर छ हजारदेखि आठ हजार डलरसम्म पुगेको छ।
कम्पनीले यात्रा सुस्त बनाएर र बन्दरगाहमा बढी समय बिताएर खर्च घटाउने प्रयास गरेको थियो। तर त्यसले बढेको खर्च धान्न नसकिएको कम्पनीको भनाइ छ। सञ्चालन घाटा बोकेर अघि बढ्न नसकिने र पूरा वृद्धि यात्रुहरूमाथि थोपर्नु व्यावहारिक नहुने भन्दै कम्पनीले अहिले यात्रु, चालक दल र कर्मचारीलाई सहयोग गर्ने काममा ध्यान दिएको जनाएको छ।
सिहानोकभिल स्वायत्त बन्दरगाहका अनुसार जहाज अक्टोबर २३ मा पाँच दिने भ्रमणका लागि त्यहाँ पुगेको थियो। त्यसपछि भियतनाम जानुपर्ने भए पनि जहाज बुधबारसम्म बन्दरगाहमै रह्यो। जहाजमा १५ राष्ट्रियताका २०३ यात्रु थिए, जसमध्ये धेरैजसो अमेरिकी थिए। साथमा १५६ चालक दलका सदस्य थिए। जहाजको क्षमता ६५० जनाको थियो। यात्रुहरूलाई जहाज छाड्न भनिएको छ, तर चालक दलको अवस्थाबारे स्पष्ट जानकारी दिइएको छैन।
