काठमाडौँ । नेपाल प्रिमियर लिग (एनपीएल) मा अहिलेसम्मको बलिङमा चितवन राइनोजका बायाँ हाते तीव्र गतिका बलर रिजन ढकाल सबैभन्दा अगाडि देखिएका छन् । मकवानपुरका युवा खेलाडी ढकालले चार खेलबाट १० विकेट लिएर सर्वाधिक विकेट लिने खेलाडीको सूचीमा पहिलो स्थान ओगटेका हुन् । त्रिभुवन विश्वविद्यालयको क्रिकेट मैदानमा जारी प्रतियोगितामा उनको निरन्तरको प्रदर्शनले चितवनको बलिङ आक्रमणलाई थप बलियो बनाएको छ ।
ढकालले विराटनगर किंग्सविरुद्ध तीन ओभरमा २५ रन खर्चेर दुई विकेट लिएका थिए । पोखरा एभेन्जर्सविरुद्ध उनले चार ओभरमा २४ रन दिएर चार विकेट लिए, जुन उनको अहिलेसम्मकै उत्कृष्ट प्रदर्शन हो । काठमाडौँ गोर्खाजविरुद्ध चार ओभरमा १४ रन खर्चेर तीन विकेट लिएका उनले सुदूरपश्चिम रोयल्सविरुद्ध एक ओभरमा १८ रन दिएर एक विकेट लिएका थिए ।
चितवनकै अर्का बलर कमलसिंह ऐरी तीन खेलमा नौ विकेट लिएर दोस्रो स्थानमा छन् । कर्णाली याक्सका अनुभवी बलर सोमपाल कामीले पाँच खेलमा नौ विकेट लिएर तेस्रो स्थान ओगटेका छन् । लुम्बिनी लायन्सका शेर मल्ल र जनकपुर बोल्ट्सका राहुल यादव समान आठ–आठ विकेटसहित चौथो र पाँचौँ स्थानमा छन् ।
यसैबीच चितवनले विराटनगरलाई आठ रनले र पोखरालाई ३० रनले हराएको छ भने सुदूरपश्चिमसँग पाँच विकेटले र काठमाडौँसँग १० रनले पराजित भएको छ । लुम्बिनीविरुद्धको खेल वर्षाका कारण स्थगित भएर अङ्क बाँडिएको थियो । ढकाल पहिलो संस्करणदेखि नै चितवनबाट खेल्दै आएका छन् ।
