काठमाडौंमा बुधबार बसेको संसदीय विशेष समितिको बैठकले कोप–३१ मा नेपालको सहभागितालाई परिणाममुखी बनाउनुपर्नेमा जोड दिएको छ। हिमालमा जलवायु परिवर्तनको प्रभाव, जलवायु न्याय तथा भोटेकोशी–त्रिशुली विपद्सम्बन्धी संसदीय विशेष समितिको बैठकमा आगामी कोप–३१ सम्मेलनमा नेपालको सहभागिता, जलवायु कूटनीति र राष्ट्रिय हितका विषयमा छलफल भएको थियो।
समितिका सभापति गणेश पराजुलीले कोप सम्मेलनमा नेपालको सहभागिता औपचारिक भ्रमणमा मात्र सीमित हुन नहुने बताए। उनका अनुसार ठोस उपलब्धि हासिल गर्ने गरी तयारी गर्नुपर्छ। अन्तर्राष्ट्रिय वार्ता तथा संवादमा सहभागी हुने प्रतिनिधिहरू विषयगत रूपमा सक्षम हुनुपर्ने, आवश्यक तयारीसहित जानुपर्ने र नेपालको हित प्रभावकारी रूपमा प्रस्तुत गर्न सक्नुपर्ने उनको धारणा थियो।
बैठकमा सम्बन्धित मन्त्री, मन्त्रालयका सचिव तथा वातावरण महाशाखा प्रमुखसँग कोप–३१ मा नेपालले उठाउने विषयहरूबारे छलफल भयो। छलफलमा प्रधानमन्त्रीले संयुक्त राष्ट्रसंघमा तथा सभामुखले अन्तर–संसदीय संघमा व्यक्त गरेका धारणालाई समेत ध्यानमा राखी नेपालको हितअनुकूल अन्तर्राष्ट्रिय वार्ता अघि बढाउनुपर्ने विषय उठाइएको थियो।
सभापति पराजुलीले सम्मेलनमा स्थापना गरिने नेपालको पेभिलियन तथा प्रस्तुत गरिने वृत्तचित्रमार्फत हालैका बाढीपहिरो र जलवायुजन्य विपद्बाट भएका क्षति प्रभावकारी रूपमा प्रस्तुत गर्नुपर्ने बताए। क्षतिको विवरण मात्र नभई नेपाल सुरक्षित र पर्यटनका लागि उपयुक्त गन्तव्य रहेको सकारात्मक सन्देशसमेत अन्तर्राष्ट्रिय समुदायसम्म पुर्याउनुपर्ने विषयमा उनले विशेष जोड दिए।
बैठकमा समितिका १५ सदस्यलाई नौवटा विषयगत क्षेत्र समेट्ने गरी पाँच समूहमा विभाजन गर्ने विषयमा समेत छलफल भयो। प्रत्येक समूहमा तीन जना सदस्य रहने प्रस्ताव गरिएको छ। सदस्यहरूको रुचि तथा विषयगत क्षमताका आधारमा जिम्मेवारी निर्धारण गर्ने विषयमा थप छलफल गरिने भएको छ। समितिले कोप–३१ मा नेपालको सहभागितालाई जलवायु न्याय, विपद्बाट भएको हानि–नोक्सानी तथा राष्ट्रिय हितका सवालमा परिणाममुखी बनाउने आवश्यकतामा जोड दिएको छ।
