कोशी प्रदेश सरकारले प्रदेशभित्रै काम गर्न चाहने युवालाई उद्यमशील बनाउन करिब आठ अर्ब रुपैयाँ बराबरको कार्यक्रम ल्याएको छ। मुख्यमन्त्री हिक्मतकुमार कार्कीले सङ्खुवासभाको सदरमुकाम खाँदबारीमा आयोजित पत्रकार भेटघाटमा चालु आर्थिक वर्षको बजेटमार्फत सो व्यवस्था गरिएको जानकारी दिएका हुन्।
साना तथा मझौला उद्यम सञ्चालन गर्न चाहने युवालाई तीन वर्षसम्म सहुलियतपूर्ण ऋण उपलब्ध गराउने उद्देश्यले कार्यक्रम अघि सारिएको मुख्यमन्त्री कार्कीले बताए। युवालाई स्वदेशमै उद्यमशील बन्न प्रेरित गर्नुका साथै उत्पादन वृद्धि र रोजगारी सिर्जनामा टेवा पुग्ने विश्वास प्रदेश सरकारले लिएको उनको भनाइ छ।
प्रदेश सरकारले युवाको उद्यमशीलता प्रवर्द्धनमार्फत अर्थतन्त्रलाई थप सुदृढ बनाउन प्राथमिकताका साथ काम गरिरहेको मुख्यमन्त्री कार्कीले उल्लेख गरे। उत्पादन र रोजगारी वृद्धि गर्दै युवालाई आफ्नै प्रदेशमा अवसर सिर्जना गर्ने वातावरण निर्माण गर्नु सरकारको लक्ष्य रहेको उनले बताए।
“अब परिवेश फरक छ र यसका पछाडि केही अन्य कारणहरू पनि छन्। हामीले चालु आर्थिक वर्षका लागि बजेट ल्याएका छौँ। नीतिगत रूपमा पनि बजेटमार्फत धेरै महत्त्वपूर्ण कार्यक्रम र योजना अघि सारेका छौँ,” मुख्यमन्त्री कार्कीले भने।
विकास बजेटको सीमा र स्रोत–साधनको सीमितताका कारण चाहेजति विकास निर्माणका काम गर्न नसकिएको उनले स्वीकार गरे। विगतका वर्षहरूमा विकासका आधारहरू तयार गरिएको र सडक सञ्जालको विस्तार तथा पूर्वाधार निर्माणलाई प्राथमिकता दिइएको उनको भनाइ थियो। नीतिगत सुधार गर्दै सुशासनको प्रत्याभूति गराउने दिशामा निरन्तर काम भइरहेको र विकास, समृद्धि तथा सुशासनलाई प्राथमिकतामा राख्दै आगामी दिनमा थप प्रभावकारी रूपमा काम गर्ने सरकारको लक्ष्य रहेको मुख्यमन्त्री कार्कीले बताए।
