चितवनको इच्छाकामना गाउँपालिका–४ स्थित घोप्टेभीरमा खसेको सुक्खा पहिरो हटाइएपछि पृथ्वी राजमार्गको मुग्लिन–मलेखु खण्ड सोमबार दिउँसो सञ्चालनमा आएको छ। पहिरो पन्छाउने काम पूरा भएपछि दिउँसो सवा दुई बजेदेखि दुवैतर्फ सवारीसाधन चल्न थालेका हुन्।
सोमबार बिहानैदेखि पहिरोले सडक अवरुद्ध भएपछि राजमार्गमा सवारीसाधनको लामो लाइन लागेको थियो। करिब नौ घण्टासम्म यात्रुहरू बाटोमै रोकिएका थिए। पहिरो हटाइएसँगै रोकिएका सवारीसाधन आफ्ना गन्तव्यतर्फ लागेका छन्।
जिल्ला प्रहरी कार्यालय चितवनका प्रमुख प्रहरी उपरीक्षक रामेश्वर पौडेलले बिहानैदेखि रोकिएका सवारीसाधन दिउँसोदेखि दुवैतर्फ चल्न थालेको जानकारी दिए। भौतिक पूर्वाधार विकासमन्त्री सुनिल लम्सालले पनि दुवैतर्फ यातायात सञ्चालनमा आएको बताएका छन्।
घोप्टेभीर खण्डमा सुक्खा पहिरो बारम्बार खस्ने गरेको छ। यसअघि तिहारका बेला पनि पहिरोले सडक अवरुद्ध भएको थियो। सोमबार बिहान फेरि पहिरो खसेपछि सडक दुईतर्फी बन्द भएको थियो। पहिरो हटाउने काम सकिएपछि मात्र सवारी आवागमन खुलाइएको हो।
पृथ्वी राजमार्ग हुँदै यात्रा गर्ने यात्रुहरू यो खण्डमा पहिरोका कारण बारम्बार रोकिनुपरेको छ। घोप्टेभीर क्षेत्रमा सुक्खा पहिरो खस्ने क्रम नरोकिएकाले सडक अवरुद्ध हुने समस्या दोहोरिइरहेको छ।
