मनसुन सकिएर आकाश खुलेसँगै म्याग्दीको घोडेपानी–पुनहिलमा पर्यटकको आगमन ह्वात्तै बढेको छ। दसैँतिहारको बिदा मनाउन र हिमाली दृश्य हेर्न चाहने आन्तरिक तथा बाह्य पर्यटकको रोजाइमा यो गन्तव्य पर्न थालेको हो।
असोजमा विपद्का कारण सुनसान बनेको घोडेपानीमा कात्तिक लागेसँगै पाहुनाको भीड फर्किएको होटल व्यवसायी बताउँछन्। अहिले दैनिक करिब २०० जना विदेशी र ५० जनाको हाराहारीमा नेपाली पर्यटक यहाँ आइरहेका छन्। चाडपर्वको बिदा र अनुकूल मौसमले आगामी दिनमा संख्या अझ बढ्ने अपेक्षा व्यवसायीको छ।
समुद्री सतहदेखि ३ हजार २१० मिटर उचाइमा रहेको पुनहिल घोडेपानीको मुख्य आकर्षण हो। यहाँबाट धौलागिरि, अन्नपूर्ण, नीलगिरि, गुर्जा, मानापाथी, माछापुच्छ्रे, मनास्लु र बराह शिखरलगायत १५ भन्दा बढी हिमाली टाकुरा देखिन्छन्। बिहान सूर्योदय हेर्न पर्यटक पुनहिलको टाकुरामा जम्मा हुन्छन् अनि घोडेपानी फर्केर वरपरका वनजंगल र गाउँबस्ती घुम्छन्।
घोडेपानीमा एकैपटक एक हजार जना बास बस्न सक्ने २५ वटा सुविधायुक्त होटल छन्। पर्यटकको आगमन बढेसँगै होटल व्यवसायी व्यस्त बनेका छन्। पोखराबाट नयाँपुल हुँदै उल्लेरीको बाटो पदयात्रा गरेर वा पोखरेबगर, घार र शिख हुँदै सडकमार्गबाट यहाँ पुग्न सकिन्छ। घोडेपानीबाट करिब आधा घण्टा हिँडेपछि पुनहिल पुगिन्छ।
कुनै समय स्थानीय किसानको चरन क्षेत्र रहेको लुङटुङ डाँडा अहिले पुनहिलका नामले विश्वभर चिनिन्छ। भारतीय सेनाबाट सेवा निवृत्त मेजर टेकबहादुर पुनले यस ठाउँको नामकरण गरी पर्यटन विकासको जग बसालेका थिए। उनकै स्मृतिमा पुनहिलमा दृश्यावलोकनस्थल पनि बनाइएको छ।
