बङ्गालको खाडीमा बनेको चक्रवातको असरले झापामा बाढी र डुबानको खतरा बढेको भन्दै जिल्ला प्रशासन कार्यालयले बासिन्दालाई तीन दिनसम्म विशेष सावधानी अपनाउन भनेको छ। सम्भावित विपद्बाट जोगिन प्रशासनले सर्वसाधारणलाई सचेत रहन आग्रह गरेको हो।
जल तथा मौसम विज्ञान विभाग र राष्ट्रिय विपद् जोखिम न्यूनीकरण तथा व्यवस्थापन प्राधिकरणको जानकारीका आधारमा कात्तिक १२ देखि १४ गतेसम्म कोशी प्रदेशमा चट्याङ र हावाहुरीसहित मध्यमदेखि भारी वर्षा हुनसक्ने प्रशासनले जनाएको छ।
पाकेको धान भित्र्याउने बेलामा मौसम बिग्रन लागेकाले किसानलाई अहिले धान नकाट्न र काटिसकेको धान सुरक्षित ठाउँमा राख्न प्रशासनले अनुरोध गरेको छ। भारी वर्षाले सडक र हवाई यात्रा तथा दैनिक काममा बाधा पर्नसक्ने भएकाले लामो दूरीको यात्रा नगर्न र वर्षा भइरहेका बेला सवारी नचलाउन पनि भनिएको छ।
खहरे खोलामा अचानक बाढी आउनसक्ने भएकाले त्यस्ता खोला वरपर नजान, किनारमा माछा मार्न र दाउरा खोज्न नजान प्रशासनले सचेत गराएको छ। हल्लाको पछि नलागी सरकारी निकायले जारी गर्ने मौसमसम्बन्धी जानकारी मात्र मान्न पनि आग्रह गरिएको छ।
सम्भावित क्षति घटाउन बुधबार सुरक्षा निकाय र नेपाल रेडक्रस सोसाइटीका प्रतिनिधिसँग आकस्मिक छलफल भएको कार्यालयले जनाएको छ। प्रमुख जिल्ला अधिकारी श्रवणकुमार पोखरेलले भारी वर्षाको पूर्वानुमान आइसकेकाले धनजनको क्षति रोक्न सबै तयारी गरिएको र स्थानीय तह, सुरक्षा निकाय, स्वयंसेवक तथा सरोकारवालालाई तयार अवस्थामा रहन निर्देशन दिइएको बताए।
