इजरायलको आमनिर्वाचन अब केवल नौ दिन टाढा रहँदा अमेरिकी राष्ट्रपति डोनाल्ड ट्रुम्पले प्रत्यक्ष राजनीतिक हस्तक्षेप गरेका छन् । आइतबार सामाजिक सञ्जाल ट्रुथ सोसलमार्फत उनले प्रधानमन्त्री बेन्जामिन नेतान्याहुलाई खुला रूपमा समर्थन गर्ने घोषणा गरेका हुन् ।
कुनै पनि अमेरिकी राष्ट्रपतिले इजरायली निर्वाचनमा यसरी सोझै उम्मेदवार पक्षधर भएर समर्थन जनाएको यो पहिलो पटक हो, जसलाई कूटनीतिक इतिहासमै असाधारण मानिएको छ ।
जनमत सर्वेक्षणहरूले नेतान्याहुको गठबन्धन सरकार गठनका लागि चाहिने ६१ सिटको जादुई सङ्ख्याभन्दा तल रहने देखाइरहेका बेला आएको यो समर्थनले दबाबमा परेका प्रधानमन्त्रीलाई ठूलो राहत दिएको छ ।
आफ्नो पोष्टमा ट्रुम्पले नेतान्याहुलाई इरानविरुद्धको अभियानमा ‘महान् साझेदार’ समेत भनेका छन् । ‘इजरायलले गलत नेता छान्ने हो भने अमेरिकाले इरानमाथिको कारबाही आफैँ अगाडि बढाउनुपर्ने हुन्छ, र म त्यो चाहन्नँ,’ उनले लेखेका छन् ।
एक्समार्फत धन्यवाद दिँदै नेतान्याहुले ‘हामी मिलेर यो अभियान पूरा गर्नेछौँ’ भनेका छन् । उनका मुख्य प्रतिद्वन्द्वी गादी इसेनकोटले भने इजरायली च्यानल १२ सँग निर्वाचन देशको पूर्ण आन्तरिक मामिला भएको र निर्णय इजरायली नागरिकले मात्र गर्ने बताएका छन् ।
निकट अतीतमा इरान र गाजा मुद्दामा चिसिएको दुई नेताबीचको सम्बन्धका कारण ट्रुम्पले समर्थन गर्न अस्वीकार गर्दै आएका थिए । उनका केही सल्लाहकारले त नेतान्याहु पराजित भएमा मध्यपूर्वमा अमेरिकी एजेन्डा सजिलै अघि बढ्ने ठान्थे । निजी कुराकानीमा उनले अक्टोबर ७ को आक्रमण रोक्न नसकेको भन्दै नेतान्याहुलाई ‘आफ्नै सबैभन्दा ठूलो शत्रु’ समेत भनेका थिए ।
तर अन्ततः उनले साथ दिने निर्णय लिए । एएफपी/एक्सिओसलाई उनले भने, ‘मैले सधैँ यो गर्ने सोच बनाएको थिएँ, तर धेरै छिटो गर्न चाहन्नथें । उहाँसँगको सम्बन्ध राम्रो छ ।’ अर्को नेतासँग काम गर्ने प्रश्नमा उनले भने, ‘सक्छु होला, सक्दिनँ होला — यो जोखिम कसले लिने ?’
यसबीच गत हप्ता दुवै नेताले निर्वाचनअघि इरानमाथि ठूलो सैन्य कारबाही सुरु गर्ने विषयमा समेत छलफल गरेका थिए । सुरुमा सकारात्मक देखिएका ट्रुम्प पछि मतदान सकिएपछिसम्म पर्खिने निष्कर्षमा पुगेका थिए ।
