काठमाडौँ । ठमेललाई मात्र नभई समग्र काठमाडौँलाई २४ घण्टा सञ्चालन गर्ने विषयमा जिल्ला प्रशासन कार्यालय काठमाडौँले अध्ययन गरिरहेको छ। ठमेल पर्यटन विकास परिषद्ले शुक्रबार आयोजना गरेको शान्ति सुरक्षासम्बन्धी छलफलमा प्रमुख जिल्ला अधिकारी ईश्वरीप्रसाद पौडेलले यसबारे प्रधानमन्त्री कार्यालय र गृह मन्त्रालयसँग छलफल भइरहेको जानकारी दिए।
सरकार ठमेललाई पर्यटकीय केन्द्रका रूपमा विकास गर्न लागिपरेको भन्दै उनले गैरकानुनी गतिविधि नियन्त्रण गर्न घरधनी र व्यवसायीको सहयोग आवश्यक रहेको बताए। ठमेलका समस्या समाधानका लागि जिल्ला प्रशासनमा मासिक बैठक गर्ने प्रस्ताव पनि उनले राखे।
काठमाडौँ महानगरपालिकाका प्रमुख प्रशासकीय अधिकृत मुक्तिराम अर्यालले सार्वजनिक शौचालय, अव्यवस्थित पार्किङ, फोहोर, ट्राफिक जाम र मगन्तेको समस्या समाधान गर्न सम्बन्धित निकायसँग सहकार्य भइरहेको बताए।
काठमाडौँ उपत्यका ट्राफिक प्रहरी कार्यालयका प्रमुख प्रहरी वरिष्ठ उपरीक्षक सुरेशप्रसाद काफ्लेले स्थानीय र व्यवसायी तयार भए ठमेललाई सवारीसाधन निषेधित क्षेत्र बनाउन ट्राफिक प्रहरीले सहयोग गर्ने बताए। जथाभावी पार्किङ गर्नेलाई कारबाही गरिने उनले उल्लेख गरे।
परिषद्का पूर्वअध्यक्ष भविश्वर शर्माले २०८१ वैशाख १ गतेदेखि लागू ठमेल २४ घण्टा सञ्चालन आचारसंहिता प्रभावकारी रूपमा कार्यान्वयन गर्नुपर्नेमा जोड दिए। व्यवसायीले राति आवतजावतमा कठिनाइ, लागुऔषध कारोबार, फोहोर र ढलका कारण सातघुम्तीमा पानी जम्ने समस्याबारे ध्यानाकर्षण गराएका थिए।
