बेइजिङ । चीनको उत्तरी प्रान्त शान्सीको राजधानी ताइयुआनमा रहेको एक अग्लो भवनमा आइतबार साँझ लागेको आगलागीमा १४ जनाको मृत्यु भएको छ भने ३० जनाभन्दा बढी घाइते भएका छन्।
स्थानीय यिङजे जिल्ला सरकार र सरकारी समाचार संस्था सिन्ह्वाका अनुसार सहरको केन्द्र भागमा रहेको हाओशेङ इन्टरनेसनल अपार्टमेन्टमा स्थानीय समयअनुसार साँझ ४ः५९ बजे आगो सल्किएको थियो। झन्डै दुई घण्टाको प्रयासपछि साँझ ७ बजेतिर आगो नियन्त्रणमा आयो भने राति ८ः३० बजे उद्धार कार्य सम्पन्न भयो। आइतबार राति ३८ जनालाई अस्पताल लगिएकोमा पाँच जनाको मृत्यु भइसकेको थियो। सोमबार बिहानसम्म मृतकको सङ्ख्या बढेर १४ पुगेको सिन्ह्वाले जनाएको छ।
आगो पाँचौँ तलबाट सुरु भएको अनुमान गरिएको छ। आठौँ तलामा रहेका केही मानिस पनि घाइते भएका छन्। रियल इस्टेट प्लेटफर्म लियान्जियाका अनुसार उक्त भवन आवासीय र व्यावसायिक दुवै प्रयोजनमा प्रयोग हुँदै आएको थियो। होटल, रेस्टुरेन्ट र बालबालिकाका शैक्षिक तालिम केन्द्र सञ्चालनमा रहेको भवन अस्पताल, विद्यालय र व्यापारिक केन्द्र नजिकै छ।
होटलमा बसेका लान नामका एक पाहुनाले सुतिरहेको बेला धुवाँको गन्ध आएपछि भिजेको तौलिया लिएर बाहिर निस्किएको बताए। आपतकालीन निकासतर्फ जाँदै गर्दा भेटिएका अन्य पाँच जनासँग मिलेर उनले झ्यालको जाली लात्तीले हानेर फुटाए र भवनबाहिरको प्लेटफर्ममा उभिए। झन्डै ४० मिनेटपछि अग्निनियन्त्रकहरूले उनीहरूको उद्धार गरे।
यो ताइयुआनमा यस वर्ष भएको दोस्रो ठूलो आगलागी हो। सहरका अधिकारीहरूले दुर्घटना रोकथामबारे बैठक गरेको ठीक दुई सातापछि यो घटना भएको हो। गत अक्टोबर २४ मा सहरको कार्य सुरक्षा समितिले कोइला खानी, रसायन र पटाकाजस्ता उच्च जोखिमयुक्त क्षेत्रसँगै अग्ला भवनको अग्नि सुरक्षामा कडा निगरानी गर्न निर्देशन दिएको थियो।
