नुवाकोटको विदुर नगरपालिका–९ स्थित खड्कथोकमा सोमबार बिहान भएको मोटरसाइकल दुर्घटनामा तीन जनाको ज्यान गएको छ।
प्रहरीका अनुसार बिहान १०ः५५ बजे बा. ९९ प. ८२०२ नम्बरको पल्सर मोटरसाइकल आफैँ अनियन्त्रित भएर सडकबाट करिब १०० मिटर तल खसेको थियो। तीनै जना एउटै मोटरसाइकलमा सवार थिए।
दुर्घटनामा गम्भीर घाइते भएका तीनै जनालाई उपचारका लागि जिल्ला अस्पताल त्रिशुली लगिएको थियो। उपचारकै क्रममा उनीहरूको मृत्यु भएको प्रहरीले जनाएको छ।
मृत्यु हुनेमा धादिङको खनियाबास गाउँपालिका–५ का ४७ वर्षीय बुद्धिमान तामाङ रहेका छन्। उनी हाल विदुर नगरपालिका–९ मा बस्दै आएका थिए।
त्यस्तै, विदुर नगरपालिका–१३ की ३१ वर्षीया बिन्दा थापामगर र सोही स्थानकी २७ वर्षीया सुनिता थापा मगरको पनि ज्यान गएको छ।
दुर्घटनाको कारणबारे प्रहरीले अनुसन्धान गरिरहेको छ। घटनाले पहाडी सडकमा सवारी चलाउँदा थप सतर्कता अपनाउनुपर्ने आवश्यकता फेरि देखाएको छ।
