काठमाडौं — तिहार, दीपावली, छठ र नेपाल संवतका अवसरमा देशभर सुरक्षा व्यवस्था कडा पारिएको छ। नेपाल प्रहरीले पर्वको समयमा हुन सक्ने अपराध र अव्यवस्था रोक्न ५० हजारभन्दा बढी प्रहरी परिचालन गरेको छ।
प्रहरीका केन्द्रीय प्रवक्ता प्रहरी नायब महानिरीक्षक अबिनारायण काफ्लेका अनुसार पर्वलाई लक्षित गरेर छुट्टै सुरक्षा कार्ययोजना तयार पारी देशभर लागू गरिएको छ। सम्भावित जोखिम पहिचान गरेर संवेदनशील क्षेत्रमा विशेष निगरानी बढाइएको उनले बताए।
जुवातास, मादक पदार्थ तथा लागुऔषध सेवन, होहल्ला, कालोबजारी, खाद्य मिसावट, पटका विस्फोट र आगलागी रोक्नु मुख्य प्राथमिकता रहेको प्रहरीले जनाएको छ। निगरानीका लागि सीसीटीभी, बडीओर्न क्यामेरा, ड्रोन र तालिमप्राप्त कुकुर प्रयोग भइरहेको छ भने पटकाको अवैध आयात रोक्न सीमा नाका र भन्सार क्षेत्रमा निगरानी कडा पारिएको छ।
देशभर चेकपोइन्ट, आकस्मिक जाँच, गस्ती र कमान्ड पोस्टमार्फत सुरक्षा व्यवस्थापन भइरहेको छ भने जुवातास र होहल्ला नियन्त्रण गर्न सादा पोसाकमा समेत प्रहरी खटाइएको छ।
यात्रु सुरक्षाका लागि देशभर ४०८ स्थानमा यात्रु सहायता कक्ष स्थापना गरिएको छ। लामो दूरीका सवारी छुट्ने स्थानमै चालकको अनुमतिपत्र तथा मादक पदार्थ र लागुऔषध सेवनको अवस्था जाँच गरिँदै छ। सीमावर्ती क्षेत्रमा स्वदेश फर्किने नेपाली ठगीमा नपरून् भनेर १०८ स्थानमा नागरिक सहायता कक्ष राखिएको छ।
कालोबजारी र खाद्य मिसावटविरुद्ध आपूर्ति विभाग, स्थानीय तह र जिल्ला प्रशासनसँग मिलेर संयुक्त बजार अनुगमन भइरहेको छ। पटकाले आगलागी र आँखामा चोट पुर्याउन सक्ने भन्दै प्रहरीले त्यस्ता सामग्री प्रयोग नगर्न आग्रह गरेको छ। शंकास्पद गतिविधि देखिएमा आपत्कालीन नम्बर १०० मा खबर गर्न पनि आग्रह गरिएको छ।
लक्ष्मीपूजामा दियो र मैनबत्ती बाल्दा सावधानी अपनाउन र बालबालिकालाई आगोबाट टाढा राख्न प्रहरीले अनुरोध गरेको छ।
