सुदूरपश्चिम प्रदेश प्रमुख नजिर मियाँले तिहार, छठ पर्व र नेपाल संवत् ११४७ को अवसरमा शुभकामना सन्देश जारी गरेका छन्। सन्देशमा उनले नेपाली समाजमा रहेका धार्मिक तथा सांस्कृतिक विविधताबिच यी पर्वले आपसी सद्भाव, सहिष्णुता र राष्ट्रिय एकता बलियो बनाउने विश्वास व्यक्त गरेका छन्।
तिहारलाई उनले मानव र अन्य जीवजन्तुबिचको सुसम्बन्धको प्रतीकका रूपमा उल्लेख गरेका छन्। तिहारमा काग, कुकुर र गाईको पूजा गर्ने तथा गोवर्धन पर्वतको अर्चना गर्ने परम्परा छ। अन्तिम दिन दिदीबहिनी र दाजुभाइबिच भाइटिका लगाउने चलनले पारिवारिक आत्मीयता र आपसी सम्बन्धलाई प्रगाढ बनाउने उनको भनाइ छ।
उज्यालो पर्वका रूपमा चिनिने तिहारमा देउसी भैलो खेल्दै आपसी सद्भाव बढ्ने र मौलिक संस्कृति पुस्तान्तरण हुँदै आएको सन्देशमा उल्लेख छ। नेवार समुदायले यही अवसरमा म्ह: पूजा गर्ने भएकाले यसको सांस्कृतिक महत्त्व अझ व्यापक रहेको उनले बताएका छन्।
छठ पर्वले तराई तथा मधेस क्षेत्रको धार्मिक तथा सांस्कृतिक परम्परालाई प्रतिनिधित्व गर्ने उल्लेख गर्दै प्रदेश प्रमुख मियाँले यस पर्वमा सूर्य देवता र छठी माताको पूजा गरिने परम्पराले प्रकृतिप्रतिको सम्मान र आस्थालाई अभिव्यक्त गर्ने बताएका छन्।
नेपाल संवत्लाई राष्ट्रिय विभूति शङ्खधर साःख्वाद्वारा प्रवर्तन गरिएको मौलिक संवत्का रूपमा उल्लेख गर्दै उनले काठमाडौँ उपत्यकासहित नेवार समुदायको बाहुल्यता रहेका स्थानमा यसलाई नयाँ वर्षका रूपमा मनाइने परम्परा रहेको जनाएका छन्। यी पर्वले विश्वका विभिन्न स्थानमा छरिएर रहेका नेपालीबिच धार्मिक तथा सांस्कृतिक विविधताका बाबजुद आपसी सद्भाव, सहिष्णुता, भ्रातृत्व र पारस्परिक सहयोगको भावना अभिवृद्धि गर्ने उनले विश्वास व्यक्त गरेका छन्।
सन्देशमा उनले स्वदेश तथा विदेशमा रहेका सम्पूर्ण नेपाली दिदीबहिनी तथा दाजुभाइमा सुख, समृद्धि, सुस्वास्थ्य र दीर्घायुको कामना गरेका छन्।
