पब्जी मोबाइल ग्लोबल ओपनको फाइनल चरणमा नेपाली टोली होरा ईस्पोर्ट्सले उत्कृष्ट सुरुआत गरेको छ। फाइनलको पहिलो दिन सकिँदा होरा ५७ अंकसहित अंक तालिकाको शीर्ष स्थानमा उक्लिएको छ।
पहिलो दिन होराले कुल ६ खेल खेलेको थियो। ती खेलमा टोलीले एउटा चिकेन डिनर हात पार्नुका साथै नियमित रूपमा अंक बटुल्दै अग्रता बनाएको हो। अंक तालिकामा होराभन्दा पछाडि यूएलएफ ५३ अंकसहित दोस्रो स्थानमा छ। त्यस्तै अल्टर इगोले ४८ अंक, एकेजीले ४४ अंक र मङ्गोल्जले ४१ अंक जोडेका छन्।
प्रतियोगिताको अन्तिम दिन आइतबार बाँकी ६ खेल हुनेछन्। आवश्यक परेमा सातौँ खेल पनि हुन सक्नेछ। यस पटक प्रतियोगितामा स्म्याश रुल लागू भएको छ। सो नियमअनुसार कुनै टोलीले ६७ अंकको थ्रेसहोल्ड पार गरेपछि त्यसपछिको कुनै खेलमा चिकेन डिनर जितेमा सोही टोली विजेता बन्नेछ र प्रतियोगिता त्यहीँ समाप्त हुनेछ।
होराका लागि आइतबारको सुरुआत नै महत्त्वपूर्ण हुनेछ। पहिलो खेलमै कम्तीमा १० अंक जोड्न सकेमा टोलीले ६७ अंकको थ्रेसहोल्ड पार गर्नेछ। त्यसपछि अर्को कुनै खेलमा चिकेन डिनर जित्न सकेमा उपाधि होराकै हातमा पर्नेछ। यसैले अन्तिम दिनका खेलहरू निर्णायक बन्ने देखिएको छ।
पहिलो दिनको अग्रताले होरालाई उपाधि दौडमा बलियो स्थितिमा पुर्याएको छ। तर थ्रेसहोल्ड पार गरिसकेपछि चिकेन डिनर जित्ने टोलीले नै उपाधि जित्ने भएकाले पछाडि रहेका टोलीहरूका लागि पनि अवसर अझै खुला छ।
