स्याङ्जा जिल्लाको कालीगण्डकी गाउँपालिका–१ पुलक्यामस्थित कालीगण्डकी नदीमा शनिबार बिहान एक पुरुषको शव भेटिएको छ। नदीको बीच भागमा ढुंगामा अड्किएको अवस्थामा देखिएको शवबारे जानकारी पाएपछि प्रहरी टोली घटनास्थलमा पुगेको थियो।
जिल्ला प्रहरी कार्यालय स्याङ्जाका सूचना अधिकारी प्रहरी नायब उपरीक्षक रमेश दत्त अवस्थीका अनुसार बिहान करिब ११ बजे फेला परेको शव अन्दाजी ४० वर्षका पुरुषको हो। तर मृतकको नाम, थर र ठेगाना अहिलेसम्म खुल्न सकेको छैन।
प्रहरीले घटनास्थलमै शवको जाँच र मुचुल्कालगायत आवश्यक कानुनी प्रक्रिया पूरा गरेको छ। त्यसपछि शवलाई वालिङस्थित प्राथमिक स्वास्थ्य केन्द्रमा राखिएको छ। घटनाको कारण र मृतकको पहिचानबारे थप अनुसन्धान भइरहेको प्रहरीले जनाएको छ।
मृतकलाई चिन्ने आफन्त वा अन्य कुनै व्यक्तिले नजिकको प्रहरी कार्यालय वा जिल्ला प्रहरी कार्यालय स्याङ्जामा सम्पर्क गरी जानकारी दिन प्रहरीले अनुरोध गरेको छ। पहिचान खुलेपछि मात्र शव आफन्तलाई बुझाउने र घटनाबारे थप विवरण सार्वजनिक गर्ने प्रहरीको भनाइ छ।
