चालु आर्थिक वर्ष २०८३/८४ को पहिलो त्रैमासमा २० वटै वाणिज्य बैंकले कुल १९ अर्ब ११ करोड रुपैयाँ खुद नाफा कमाएका छन्। बैंकहरूले सार्वजनिक गरेको अपरिष्कृत वित्तीय विवरणअनुसार अघिल्लो वर्षको सोही अवधिको तुलनामा नाफा ३९ प्रतिशतले बढेको हो। अधिकांश बैंकको नाफामा सुधार देखिएको छ भने केहीको नाफामा सामान्य गिरावट आएको छ।
यस अवधिमा १० वटा बैंकले एक अर्ब रुपैयाँभन्दा बढी नाफा आर्जन गरेका छन्। सबैभन्दा धेरै नाफा कमाउने सूचीमा नबिल बैंक पहिलो स्थानमा छ। नबिलले दुई अर्ब ५५ करोड रुपैयाँ नाफा कमाएको छ भने गत वर्षको सोही अवधिमा उसको नाफा एक अर्ब ७५ करोड रुपैयाँ थियो। दोस्रो स्थानमा रहेको ग्लोबल आइएमई बैंकले दुई अर्ब ३१ करोड रुपैयाँ नाफा आर्जन गरेको छ।
सरकारी स्वामित्वको राष्ट्रिय वाणिज्य बैंकले उल्लेख्य सुधार गर्दै एक अर्ब ६४ करोड रुपैयाँ नाफा कमाएको छ। गत वर्ष उसको नाफा ५८ करोड रुपैयाँ मात्र थियो। एक अर्बभन्दा बढी नाफा कमाउने अन्य बैंकमा एभरेष्ट बैंक एक अर्ब २५ करोड, प्राइम कमर्सियल बैंक एक अर्ब १८ करोड, नेपाल इन्भेष्टमेण्ट मेगा बैंक एक अर्ब १८ करोड, एनएमबि बैंक एक अर्ब १६ करोड, कृषि विकास बैंक एक अर्ब नौ करोड, कुमारी बैंक एक अर्ब सात करोड र सानिमा बैंक एक अर्ब पाँच करोड रुपैयाँ रहेका छन्।
गत वर्षको पहिलो त्रैमासमा २२ करोड रुपैयाँ नोक्सानीमा रहेको सिटिजन्स बैंक यस वर्ष १० करोड रुपैयाँ नाफा कमाउँदै नाफामा फर्किएको छ। लक्ष्मी सनराइज बैंक, प्रभु बैंक र सिद्धार्थ बैंकले पनि आफ्नो नाफामा दोब्बरभन्दा बढीको वृद्धि गरेका छन्।
