फ्रान्समा महँगी र जीवनयापनको बढ्दो खर्चविरुद्ध शनिबार पनि देशभर ठूलो प्रदर्शन भएको छ। लगातार तेस्रो सातासम्म पुगेको आन्दोलनमा गृह मन्त्रालयका अनुसार करिब तीन लाख २० हजार मानिस सहभागी भए। विद्यार्थी तथा युवा संगठनहरूले भने सहभागीको संख्या झन्डै पाँच लाख पुगेको दाबी गरेका छन्।
राजधानी पेरिसमा साँझ पाँच बजेसम्म ७० हजार प्रदर्शनकारी सडकमा उत्रिएका थिए। युवा संगठनहरूको दाबीअनुसार राजधानीमा सहभागीको संख्या दुई लाख पुगेको थियो। प्रदर्शनकारीहरूले महँगी, आवासको अभाव, शिक्षा तथा सार्वजनिक सेवाको कमजोर अवस्थाप्रति असन्तुष्टि व्यक्त गरे। विद्यालय र विश्वविद्यालयका विद्यार्थी, श्रमिक संगठन तथा विभिन्न समूह प्रदर्शनमा सहभागी भए।
अक्टोबर १७ यता भएका ठूला प्रदर्शनमध्ये यो तेस्रो हो। सरकारी तथ्यांकअनुसार अक्टोबर १७ मा पाँच लाख ५० हजार र अक्टोबर २४ मा चार लाख १० हजार मानिस सडकमा उत्रिएका थिए। यसपटक सहभागीको संख्या अघिल्ला दुई साताको तुलनामा घटेको छ।
प्रदर्शनका कारण पेरिसमा सार्वजनिक यातायात प्रभावित भयो। यातायात सेवा प्रदायक आरएटीपीका अनुसार ४० भन्दा बढी मेट्रो स्टेसन बन्द गरिए भने केही क्षेत्रमा ट्राम सेवा पनि अवरुद्ध भयो।
दिनभर अधिकांश प्रदर्शन शान्तिपूर्ण रहे पनि पेरिस र लियोनलगायत सहरमा झडप भए। पेरिसमा प्रदर्शनको अन्त्यतिर केही समूहले प्रहरीमाथि ढुङ्गा प्रहार गरेपछि प्रहरीले अश्रुग्यास प्रयोग गर्यो। सम्भावित हिंसा नियन्त्रण गर्न देशभर ७० हजार प्रहरी र जन्डार्म तैनाथ गरिएको थियो। शनिबार रातिसम्म विभिन्न स्थानमा सयौँ मानिस पक्राउ परेका थिए।
सहभागीको संख्या घट्दै गए पनि सरकारविरुद्धको असन्तुष्टि कायमै रहेको देखिएको छ। युवा तथा विद्यार्थी संगठनहरूले माग सम्बोधन नभए आन्दोलन जारी राख्ने बताएका छन्।
