नेपाली कांग्रेसका महामन्त्री प्रदीप पौडेलले विचौलिया प्रकरणमा गहिरो र निष्पक्ष छानबिन गर्न संसदीय समिति गठन गर्नुपर्ने माग गरेका छन्। सोमबार सिंहदरबारमा बसेको पार्टी संसदीय दलको बैठकपछि सञ्चारकर्मीसँग कुरा गर्दै उनले अदालत, सरकार र राज्यका विभिन्न निकायसँग जोडिएको यो विषयमा सत्यतथ्य बाहिर ल्याउनुपर्ने बताए।
पौडेलले सरकार स्वयं यो प्रकरणमा जोडिएकाले सरकारले मात्रै छानबिन गरेर निष्पक्ष नतिजा दिन नसक्ने तर्क गरे। अदालत, सरकार र समग्र राज्य संरचनालाई विचौलियाबाट मुक्त बनाउनुपर्ने उनको भनाइ छ। उनले छानबिन गहिराइसम्म पुगेर दूधको दूध र पानीको पानी छुट्याउनुपर्ने बताए।
महामन्त्री पौडेलले पछिल्लो समय सञ्चारमाध्यम र पत्रकारमाथि भएको हस्तक्षेपप्रति पनि असन्तुष्टि व्यक्त गरे। दुई तिहाइ बहुमतको सरकार बनेपछि प्रेस स्वतन्त्रता अझ सुरक्षित र विकसित हुने अपेक्षा गरिएको भए पनि त्यसको विपरीत पत्रकारमाथि नियन्त्रण, दबाब र तर्साउने प्रयास भएको उनको आरोप छ। उनले यतिबेला शाहीकालमा भन्दा बढी प्रेसमाथि हस्तक्षेप भएको समेत बताए।
सत्तारूढ दलका नेताहरूले पनि पत्रकारमाथिको हस्तक्षेपको विरोध गरेको उल्लेख गर्दै पौडेलले सरकारको कामसँग सत्तारूढ दल सहमत नभए छानबिनको मागमा विपक्षीसँगै उभिनुपर्ने बताए। सरकारले गरेको कामको जिम्मेवारी सत्तारूढ दलले लिन नसक्ने हो भने निष्पक्ष छानबिनका लागि विपक्षीको आवाजमा आवाज मिलाउनुपर्ने उनको भनाइ छ।
उनले संघीय संसद्को अधिवेशन तत्काल बोलाउन र प्रकरणको छानबिनका लागि संसदीय समिति गठन गर्न जोड दिए। साथै विवादित न्यायाधीशमाथि महाभियोग लगाउने विषयमा अन्य विपक्षी दलसँग परामर्श गरेर अघि बढ्ने कांग्रेसको तयारी रहेको उनले जानकारी दिए।
