काठमाडौं । नेपाली कांग्रेस संसदीय दलले पत्रकारमाथि भएको धरपकडलगायत पछिल्ला घटनाको स्वतन्त्र छानबिन गर्न संसदीय विशेष समिति गठन गर्न माग गरेको छ । सोमबार बसेको संसदीय दलको बैठकले यस्तो निर्णय गरेको हो ।
बैठकपछि सञ्चारकर्मीसँग कुरा गर्दै दलका नेता भीष्मराज आङ्देम्बेले पत्रकार पक्राउ र त्यससँग जोडिएका सरकारका विवादास्पद कदमको निष्पक्ष र पारदर्शी छानबिन हुनुपर्ने बताए । दोषी देखिएकालाई कानुनअनुसार कारबाही गर्नुपर्ने उनको भनाइ थियो ।
पत्रकार पक्राउको स्पष्ट कानुनी आधार, पुर्जी वा अदालतको अनुमति सार्वजनिक नगरी समाचार कक्षभित्रै प्रहरी पठाइनु स्वतन्त्र पत्रकारितामाथिको दबाब मात्र नभई विधिको शासनविपरीत कार्य भएको आङ्देम्बेले बताए । उनले यसलाई स्वेच्छाचारी कदम भन्दै सरकारले यसको जवाफ दिनुपर्ने बताए ।
पछिल्ला सरकारी गतिविधिले नागरिक स्वतन्त्रता, प्रेस स्वतन्त्रता, संवैधानिक निकायको स्वायत्तता र विधिको शासनमाथि गम्भीर प्रश्न उठाएको संसदीय दलको निष्कर्ष छ ।
जनसरोकार र सुशासनका विषयमा सरकारले गर्ने राम्रा काममा कांग्रेसको साथ रहने भए पनि लोकतन्त्र, प्रेस स्वतन्त्रता र शक्तिपृथकीकरणजस्ता आधारभूत मूल्यविपरीत सरकार अघि बढे विरोध गरिने आङ्देम्बेले स्पष्ट पारे । न्यायपालिकाको स्वतन्त्रता अक्षुण्ण राख्नुपर्नेमा पनि उनले जोड दिए । सरकारले जे गरे पनि जवाफ दिनु नपर्ने मानसिकताबाट काम गरिरहेको आरोप लगाउँदै उनले यस्ता घटनाले मुलुकको संवैधानिक संरचना कमजोर बनाउँदै आफू अनुकूल शासन स्थापित गर्ने सुनियोजित प्रयासको श्रृंखला देखाएको बताए ।
