काठमाडौं । शिक्षा क्षेत्रमा बजेट कटौती, आवासको चर्को मूल्य, बेरोजगारी र भ्रष्टाचारविरुद्ध युरोपभरका युवाहरू सडकमा उत्रिएका छन् । नयाँ पुस्ता अर्थात् जेनेरेसन–जीका प्रदर्शनले विभिन्न युरोपेली सरकारमाथि दबाब बढाएको छ ।
फ्रान्समा विद्यार्थी प्रदर्शन चर्किएको छ । पेरिस, मार्सेली, लियोनलगायतका सहरमा दसौँ हजार प्रदर्शनकारीले सार्वजनिक र निःशुल्क शिक्षाको माग गर्दै जुलुस निकालेका छन् । विद्यार्थीहरूले कक्षामा विद्यार्थी संख्या घटाउन, शिक्षकका लागि बजेट बढाउन र युवामाथि हुने प्रहरी हिंसा अन्त्य गर्न माग गरेका छन् ।
जर्मनीमा ‘जेनजीले जिम्मा लिन्छ’ भन्ने अभियानको आह्वानमा ३४ भन्दा बढी सहरमा हजारौँ युवा सडकमा निस्किए । शान्तिपूर्ण रूपमा सुरु भएको प्रदर्शन रात परेसँगै केही सहरमा हिंसात्मक बन्यो । फ्र्यांकफर्टमा पसलमा तोडफोड र लुटपाट भयो भने बर्लिन, कोलोन र ह्याम्बर्गमा प्रहरीसँग झडप भयो । आयोजकले भने हिंसाको निन्दा गर्दै अतिवादी समूह जिम्मेवार रहेको बताएका छन् ।
स्पेनबाट सुरु भएको आवाससम्बन्धी आन्दोलन पोर्चुगलसम्म फैलिएको छ । लिस्बनको रोसियो स्क्वायरमा हरेक साँझ हजारौँ मानिस भेला भएर घरभाडामा सीमा तोक्न माग गरिरहेका छन् । अल्बानियामा अमेरिकी राष्ट्रपति डोनाल्ड ट्रम्पका ज्वाइँ जेरेड कुश्नरसँग जोडिएको विलासी परियोजनाविरुद्ध विद्यार्थीले प्रदर्शन गरिरहेका छन् भने सर्बियामा दुई वर्षदेखि विद्यार्थीको नेतृत्वमा आन्दोलन चलिरहेको छ ।
फ्रान्सको सरकारी ऋणपत्रको प्रतिफल सन् २००२ यताकै उच्च बिन्दुमा पुगेकाले बजेटमाथिको दबाब झनै बढेको छ । युवाहरूले आफ्ना अभिभावकको पुस्ताले पाएका अवसर आफूले नपाउने हो कि भन्ने चिन्ता व्यक्त गरेका छन् ।
