म्याग्दीको मङ्गला गाउँपालिका–३, बरंजामा बस्ने गमबहादुर श्रीसको दिन बिहान र बेलुका फार्ममै बित्छ। बाख्राको हेरचाह, सुन्तलाका बोटको स्याहार र मौरीका घारको निगरानी उनको मुख्य काम बनेको छ। लामो समय राजनीतिमा बिताएका उनी अहिले खेती र पशुपालनमा केन्द्रित छन्।
छ वर्षअघि उनले एक लाख रुपैयाँ खर्चेर दुईवटा बाख्रा किनेर काम थालेका थिए। अहिले उनको श्रीस कृषि तथा पशुपन्छी फार्ममा ३० वटा बाख्रा छन्। हरेक वर्ष १५ देखि २० वटासम्म खसीबोका बिक्री हुन्छन्। खेतबारीमा लगाइएका ३५० सुन्तलाका बोटले फल दिन थालेका छन्। १६ वटा मौरीका घार छन् र सिँचाइ पोखरीमा माछा पनि पालिएका छन्।
सुरुका दिन सहज थिएनन्। ताराखोलाबाट ल्याइएका बाख्रा यहाँको हावापानीसँग नमिल्दा नोक्सान भयो। तर उनी रोकिएनन्। पशु अस्पताल तथा पशु सेवा विज्ञ केन्द्रको सहयोगमा आधुनिक खोर बनाइयो। मङ्गला गाउँपालिकाले मौरीपालनका लागि तालिम, प्राविधिक सहयोग र घार खरिदमा अनुदान दिएको छ। सुन्तला खेती र सिँचाइ विस्तारमा राष्ट्रिय कृषि आधुनिकीकरण परियोजना र कृषि विकास कार्यालयको पनि सहयोग पुगेको छ।
श्रीसको कामको प्रभाव फार्मभन्दा बाहिर पनि देखिएको छ। उनको अगुवाइमा नमूना कृषक समूह बनेपछि बरंजाका १५ घरपरिवार व्यावसायिक बाख्रापालनमा लागेका छन्। गाउँमा उत्पादन भएको दूध तातोपानी र बेनी बजारमा बिक्री हुन्छ। श्रीसका अनुसार पहाडी गाउँमा भएको जमिन, हावापानी र स्थानीय स्रोतको सही प्रयोग गर्न सके गाउँमै रोजगारी र आम्दानी सम्भव छ।
विद्यार्थी जीवनदेखि नेकपा (माओवादी) मा लागेका श्रीस २०५८ सालदेखि भूमिगत राजनीतिमा सक्रिय थिए। उनी २०६३ सालमा अन्तरिम व्यवस्थापिका संसद्का सदस्य बने र २०६४ देखि २०७० सालसम्म पहिलो संविधानसभामा रहे। अहिले उनी नेपाली कम्युनिस्ट पार्टी (नेकपा) का केन्द्रीय सदस्य छन् र राजनीतिसँगै कृषि उद्यम अघि बढाउने योजनामा छन्।
