झापामा सयपत्री फूलको व्यावसायिक खेती गर्ने किसानहरू स्थानीय बजारमा आफ्नो उत्पादनले स्थान नपाएको भन्दै जिल्ला प्रशासन कार्यालय पुगेका छन्। भारतबाट भित्रिने फूलले बजार ओगट्दा बोटमै फूल खेर जाने अवस्था आएको उनीहरूको गुनासो छ।
विर्तामोडकी कृषक शुष्मा पौडेलको नेतृत्वमा २० जना किसानको टोलीले मंगलबार प्रमुख जिल्ला अधिकारी श्रवणकुमार पोखरेललाई भेटेर सात बुँदे मागपत्र बुझाएको छ। मागपत्रमा स्वदेशी सयपत्रीलाई स्थानीय बजारमा पहिलो प्राथमिकता दिनुपर्ने माग पहिलो बुँदामै राखिएको छ।
किसानका अनुसार जिल्लामा १५ देखि २० हेक्टरमा सयपत्रीको व्यावसायिक खेती हुँदै आएको छ। विर्तामोड, मेचीनगर, भद्रपुर, दमक र शिवसताक्षीलगायतका क्षेत्रमा लाखौँ लगानी गरेर गरिएको खेतीले रोजगारी र आम्दानीको बाटो खोले पनि बजार नपाउँदा यसअघि नै आर्थिक क्षति बेहोर्नुपरेको उनीहरू बताउँछन्।
स्थानीय उत्पादनले स्थानीय माग धान्न सक्ने अवस्था रहेको भन्दै किसानहरूले भारतीय फूलको आयात रोक्न नीतिगत पहल गर्न माग गरेका छन्। सीमा र भन्सारमा प्रभावकारी अनुगमन गरेर अनधिकृत आयात नियन्त्रण गर्नुपर्ने, उत्पादनको न्यायोचित मूल्य र सहज बजारको व्यवस्था मिलाउनुपर्ने उनीहरूको माग छ।
सरकारी कार्यालय, विद्यालय, होटल र सङ्घसंस्थामा स्वदेशी फूल प्रयोग गर्न प्रोत्साहित गर्न, फूलखेतीको वास्तविक तथ्याङ्क सङ्कलन गरेर दीर्घकालीन योजना बनाउन र संरक्षण तथा बजार विस्तारका लागि सरकारी सहयोग उपलब्ध गराउन पनि मागपत्रमार्फत ध्यानाकर्षण गराइएको छ।
