काठमाडौं — बडादशैंको लामो बिदापछि रगतको भण्डार सकिएपछि नेपाल रेडक्रस सोसाइटीले रक्तदानका लागि विशेष अनुरोध गरेको छ। चाडपर्वको अवधिमा रक्तदान कार्यक्रम हुन नसक्दा अस्पतालमा उपचाररत बिरामीका लागि चाहिने रगतको माग दिनहुँ बढिरहेको रेडक्रसले जनाएको छ।
केन्द्रीय रक्तसञ्चार सेवाका प्रमुख डा. प्रकाश यादवका अनुसार केन्द्रमा रगतको मौज्दात सकिएको छ। रक्तदान गरेको तीन महिना पूरा भएका स्वयंसेवी रक्तदाता र १८ वर्ष उमेर पूरा भएका युवायुवतीलाई रक्तदान गर्न उनले अनुरोध गरेका छन्। नियमित रक्तदानले अस्पतालमा रगतको आपूर्ति सहज बनाउन मद्दत पुग्ने उनको भनाइ छ।
रेडक्रसका अध्यक्ष डा. विशालकुमार भण्डारीले चाडपर्वका कारण रक्तदान कार्यक्रममा कमी आएको र त्यसले रगतको सहज व्यवस्थापनमा कठिनाइ भएको बताए। उनले स्वयंसेवी रक्तदाता तथा विभिन्न संघसंस्थालाई रक्तदान कार्यक्रम आयोजना गर्न आह्वान गरेका छन्। संघसंस्थाले कार्यक्रम आयोजना गरेमा धेरै रक्तदाता एकै ठाउँमा भेला हुन सक्ने र रगत सङ्कलन सहज हुने उनको विश्वास छ।
रेडक्रसले ७३ जिल्लाका १२० स्थानमा रहेका रक्तसञ्चार सेवा केन्द्र तथा एकाइहरूमार्फत सेवा दिइरहेको छ। रगतको अभावले उपचारमा असर नपरोस् भनेर नियमित रक्तदान गर्नु आवश्यक रहेको रेडक्रसको भनाइ छ। बिरामीको जीवन जोगाउन रक्तदान गर्न चाहनेहरूले नजिकको रक्तसञ्चार केन्द्रमा सम्पर्क गर्न सक्नेछन्।
