पोखराको लेकसाइडमा एउटा शिशु फेला परेको घटनामा प्रहरीले एक महिलालाई पक्राउ गरेको छ। पोखरा महानगरपालिका वडा नम्बर ६, लेकसाइडको स्ट्रिट नम्बर ८ भित्रको गल्लीमा रहेको टिनले छाएको टहराको शौचालयमा समस्या देखिएपछि घरधनीले बाहिरको च्याम्बर खोलेर हेर्दा भर्खरै जन्मिएको पुरुष शिशु मृत अवस्थामा भेटिएको थियो।
गत कात्तिक ३ गते साँझ करिब ७:४० बजे खबर पाएपछि वडा प्रहरी कार्यालय बैदामबाट गएको टोलीले प्रारम्भिक अनुसन्धान र मुचुल्का गरेको थियो। शिशुको शव परीक्षणका लागि पोखरा स्वास्थ्य विज्ञान प्रतिष्ठानअन्तर्गतको पश्चिमाञ्चल क्षेत्रीय अस्पताल पठाइएको थियो। अनुसन्धानका क्रममा ती महिला फरार रहेको खुलेको थियो।
पक्राउ परेकी महिला १९ वर्षीया निरूता नेपाली हुन्। उनको माइतीघर पोखरा महानगरपालिका वडा नम्बर २१ को कृस्ती हो भने स्थायी ठेगाना स्याङ्जाको अर्जुनचौपारी गाउँपालिका वडा नम्बर १ हो। उनी लेकसाइडमा भाडामा बस्दै आएकी थिइन्। खोजतलासपछि प्रहरीले कात्तिक ४ गते राति १:१५ बजे पोखरा–२१ को लुकुन्स्वाराबाट उनलाई पक्राउ गरेको हो।
स्वास्थ्य परीक्षणपछि सन् २०७८ मा स्याङ्जाका राजन सार्कीसँग सामाजिक परम्पराअनुसार उनको विवाह भएको खुलेको प्रहरीले जनाएको छ। कास्की जिल्ला अदालतबाट कर्तव्य ज्यानसम्बन्धी कसूरमा १० दिनको म्याद थप गरी उनीमाथि थप अनुसन्धान भइरहेको जिल्ला प्रहरी कार्यालय कास्कीले जनाएको छ।
