शरद यामसँगै निलो आकाश र हिमशृङ्खलाले पोखराको रूप झन् उज्यालिएको छ। दसैँपछि पर्यटकको आगमन बढेको छ र पर्यटनको राजधानी यतिबेला चहलपहलले भरिएको छ। आकाशमा दैनिक प्याराग्लाइडिङ, हट एयर बेलुन, अल्ट्रालाइट उडान र स्काइडाइभिङ भइरहेका छन्।
पोखराको पर्यटन प्रकृति, संस्कृति र साहसिक गतिविधिको संगमका रूपमा चिनिन्छ। त्यसैमध्येको स्काइडाइभिङमा सहभागीले १३ हजार फिटभन्दा माथि उडेको हेलिकप्टरबाट हाम फाल्छन् र प्यारासुटको सहायतामा जमिनमा ओर्लन्छन्। हाम फालेको करिब ५० सेकेन्डपछि प्यारासुट खुल्छ र त्यसपछि सातदेखि आठ मिनेटसम्म आकाशमा उडान हुन्छ।
विसं २०६७ मा पहिलोपटक परीक्षण उडान भएको यो खेल अब वर्षभरि नियमित सञ्चालन हुने भएको छ। यसअघि वर्षमा एक वा दुई याममा मात्र सञ्चालन हुन्थ्यो। सिम्रिक एयरसँगको सहकार्यमा स्काइडाइभिङ इन नेपाल प्रालिले पोखरा महानगरपालिका–२३, पामेको लौराकस्थित एभिया क्लबको अभ्यास मैदानबाट यो सेवा दिइरहेको छ।
प्रशिक्षक एलिस थापाका अनुसार अक्टोबरयता ३५ जनाले प्रशिक्षकसहित र २० जनाले एक्लै हाम फालेका छन्। असोज–कात्तिकमा मौसम सफा हुने भएकाले यो समयमा आउनेको संख्या बढी हुन्छ। अनुभवी विदेशी नागरिक एक्लै उड्न रुचाउँछन् भने नेपालीमा पनि आकर्षण बढ्दै गएको छ।
नेपालीका लागि डिलक्स प्याकेज एक लाख दुई हजार, भिआइपी एक लाख २३ हजार र डायमण्ड प्याकेज एक लाख ४९ हजार रुपैयाँ तोकिएको छ। विदेशी नागरिकले क्रमशः ७५०, ९०० र एक हजार २०० डलर तिर्नुपर्छ। एलिस थापासहित सुवास थापा, मनिष हिराचन र नेपालकी पहिलो महिला स्काइडाइभर यसोदा केसी थापाले प्रशिक्षण दिइरहेका छन्।
सञ्चालक निर्मल पाण्डेका अनुसार नेपाल नागरिक उड्डयन प्राधिकरणले मनोरञ्जनात्मक उड्डयन सञ्चालन प्रमाणपत्र (आरएओसी) दिएपछि नियमित सञ्चालन सम्भव भएको हो। गत वर्षसम्म प्राधिकरणले एकपटकमा १५ दिनका लागि मात्र अनुमति दिन्थ्यो। हाल यो प्रमाणपत्र पाउने एक मात्र कम्पनी स्काइडाइभिङ इन नेपाल हो।
