काठमाडौं । सर्वोच्च अदालतका लागि सिफारिस भएका न्यायाधीश चन्द्रबहादुर सारुविरुद्ध संसदीय सुनुवाइ समितिमा उजुरी परेको छ । शुक्रबार बसेको समितिको बैठकमा उजुरीकर्ता विनोद सञ्जेलसँग छलफल सुरु भएको हो ।
सञ्जेलले काभ्रेमा भएको जबरजस्ती करणीको मुद्दामा तत्कालीन उच्च अदालतका न्यायाधीश रहेका सारुले तथ्य र प्रमाणको विपरीत अभियुक्तलाई सफाइ दिएको आरोप लगाए । उनका अनुसार उक्त फैसलामा वस्तुनिष्ठता देखिएन । न्याय निरूपण गर्दा निष्पक्ष हुनुपर्ने भए पनि प्रतिवादीको भनाइ र पीडितको जाहेरीलाई पछि बनाइएको भनाइ भनिएको र जाहेरी दिन ढिलाइ भएको विषयलाई आधार बनाइएको उनको गुनासो छ ।
छलफलमा समिति सदस्य आनन्द ढुंगाना र प्रेम दंगालले न्याय निरूपण निष्पक्ष हुनुपर्नेमा सहमति जनाए । उनीहरूले उक्त मुद्दामा सर्वोच्च अदालतमा पुनरावेदन भएको छ कि छैन भनेर सोधे ।
अर्का सदस्य मधुकुमार चौलागाईले सरोकारवाला व्यक्ति आफैं नआएर सञ्जेल उजुरी लिएर किन आए भनी प्रश्न गरे । उनले उच्च अदालतले कुन प्रमाणलाई आधार नमानेको हो भन्ने प्रस्ट पार्न पनि आग्रह गरे ।
सदस्य वर्षमान पुनले उजुरीका विषयमा कार्यसम्पादन र निष्पक्षतामाथि प्रश्न उठेको उल्लेख गर्दै भोलि प्रमाण बुझिने बताए । उनले दुई न्यायाधीशले फैसला गर्दा मत किन नबाझिएको भनी पनि प्रश्न गरे ।
सञ्जेलले जवाफमा मुद्दाको सम्बन्धित पक्ष पीडित आफैं रहेको प्रस्ट पारे ।
