दैलेख जिल्ला झन्डै एक महिनादेखि प्रमुख जिल्ला अधिकारीविहीन छ। दसैं सकिएको पनि धेरै भइसक्यो, तिहार नजिकिँदै छ, तर जिल्ला प्रशासन कार्यालयमा अझै नयाँ प्रमुख जिल्ला अधिकारी आएका छैनन्। यसले जिल्लाका बासिन्दाको दैनिक कामकाजमा प्रत्यक्ष असर परेको छ।
पहिलेका प्रमुख जिल्ला अधिकारी आनन्द सारु सरुवा भएपछि उनको ठाउँमा कोही नआउँदा कार्यालय अहिले सहायक प्रमुख जिल्ला अधिकारी महेन्द्रजङ्ग शाहीको भरमा चलिरहेको छ। शाहीका अनुसार प्रमुख अधिकारी नहुँदा आर्थिक विषय र ठूला मुद्दा हेर्ने तथा फैसला गर्ने अधिकार उनीसँग छैन।
यसको मार कर्मचारी र सर्वसाधारण दुवैलाई परेको छ। प्रशासनभित्रका २२ जना कर्मचारीले तलब पाएका छैनन् भने जीवन निर्वाह भत्ता पाउने ३० जनाको काम रोकिएको छ। विभिन्न कानुनी प्रक्रियामा राखिएको धरौटी फिर्ता, वैदेशिक रोजगारीमा ज्यान गुमाएकाका परिवारले पाउने क्षतिपूर्ति र दैवी प्रकोपका पीडितले पाउने राहत रकमको भुक्तानी पनि पूर्ण रूपमा ठप्प भएको लेखापाल रूपाखेतीले बताए।
भौगोलिक रूपमा संवेदनशील मानिने दैलेखमा कर्णाली राजमार्ग, दैलेख–सुर्खेत सडक र मध्यपहाडी राजमार्गको आवागमन तथा सुरक्षा व्यवस्थापनका लागि निरन्तर नेतृत्व आवश्यक पर्छ। नेतृत्व नै नहुँदा शान्ति सुरक्षाको अवस्था थप जोखिमपूर्ण बन्दै गएको छ। उद्योग वाणिज्य सङ्घ दैलेखका अध्यक्ष नरेन्द्र थापाले सरकारलाई तत्काल नयाँ प्रमुख जिल्ला अधिकारी पठाउन आग्रह गरेका छन्।
