काठमाडौंबाट महेन्द्रनगरतर्फ गइरहेको यात्रुवाहक बसभित्र महिला यात्रुमाथि दुर्व्यवहार गरेको आरोपमा प्रहरीले तीन युवालाई पक्राउ गरेको छ। पक्राउ पर्नेहरू भीमदत्त नगरपालिका–९ का समीर बिष्ट र अनिल नाथ योगी तथा भीमदत्त नगरपालिका–३ तिलकेनीका जीवन बम हुन्। जिल्ला प्रहरी कार्यालय कञ्चनपुरका प्रवक्ता प्रहरी नायब उपरीक्षक टेकबहादुर रावतले उनीहरूलाई कञ्चनपुरकी एक युवतीले दिएको निवेदनका आधारमा नियन्त्रणमा लिइएको जानकारी दिए।
युवतीले १७ कात्तिकमा काठमाडौंबाट महेन्द्रनगर आउने क्रममा आफूमाथि दुर्व्यवहार भएको भन्दै उजुरी दिएकी थिइन्। महाकाली यातायातको बसमा जडान गरिएको सीसीटीभी क्यामेरामा कैद भएको भिडियो सामाजिक सञ्जालमा फैलिएपछि घटनाले व्यापक चासो पाएको थियो।
बसका कर्मचारीका अनुसार काठमाडौंबाट चढेका तीनै युवाले धादिङको धार्केदेखि मदिरा सेवन गरेर होहल्ला गर्न थालेका थिए। उनीहरूले महिला यात्रुलाई लक्षित गर्दै अपशब्द प्रयोग गर्नुका साथै अभद्र व्यवहार गरेपछि अन्य यात्रुले पटक–पटक सम्झाएका थिए। तर आग्रह बेवास्ता गर्दै दुर्व्यवहार जारी राखेपछि बसभित्रको वातावरण तनावपूर्ण बनेको थियो।
घटनाकै राति बसमा सवार यात्रुहरूले तीनै जनालाई वडा प्रहरी कार्यालय बुटवलको जिम्मा लगाएका थिए। इलाका प्रहरी कार्यालय बुटवलका प्रमुख प्रहरी नायब उपरीक्षक निशान्त श्रीवास्तवका अनुसार सूचना पाएपछि वडा प्रहरीको टोलीले मध्यरातमा बुटवल चौराहबाट उनीहरूलाई नियन्त्रणमा लिएको थियो।
बुटवल प्रहरीको हिरासतमा एक रात बसेपछि पीडित महिलाहरूले नै महेन्द्रनगर पठाइदिन आग्रह गरेपछि उनीहरूलाई त्यहाँ पठाइएको थियो। त्यसपछि पीडित युवतीको निवेदनका आधारमा कञ्चनपुर प्रहरीले तीनै जनालाई पुनः नियन्त्रणमा लिएर अनुसन्धान थालेको छ।
