काठमाडौँ — खाद्य प्रविधि तथा गुण नियन्त्रण विभागले बालबालिका, गर्भवती महिला र सुत्केरी महिलालाई इनर्जी ड्रिङ्क्स नखान आग्रह गरेको छ। मधुमेहलगायतका रोग भएका व्यक्ति र क्याफिनले छिटो असर गर्ने व्यक्तिले पनि यस्ता पेय पदार्थबाट टाढै रहनु राम्रो हुने विभागको भनाइ छ।
विभागले इनर्जी ड्रिङ्क्सको सुरक्षित उपभोगबारे उपभोक्ता, उत्पादक र सरोकारवालालाई जानकारी गराउँदै यस्तो आग्रह गरेको हो। यस्ता पेय खान मिल्ने व्यक्तिले समेत एक दिनमा दुई क्यानभन्दा बढी सेवन नगर्न विभागले सुझाव दिएको छ। पानी, जुस, दूध वा मोहीजस्ता पौष्टिक पेय पदार्थको साटो इनर्जी ड्रिङ्क्स प्रयोग नगर्न र अर्को पेय पदार्थमा मिसाएर नखान पनि भनिएको छ।
नेपालमा अहिले १७ वटा उद्योगले सम्बन्धित निकायबाट अनुमति लिएर इनर्जी ड्रिङ्क्स उत्पादन तथा बिक्री गरिरहेको विभागले जनाएको छ। उत्पादनको लेबल विवरण र प्रयोगशाला विश्लेषण प्रतिवेदनअनुसार हरेक क्यानमा १०० मिलिग्राम क्याफिन प्रयोग गरिएको पाइएको छ। युरोपेली खाद्य सुरक्षा प्राधिकरण र अमेरिकी खाद्य तथा औषधि प्रशासनलगायतका संस्थाले स्वस्थ वयस्कका लागि सबै खाद्य तथा पेय पदार्थबाट प्राप्त हुने कुल क्याफिनको मात्रा दैनिक ४०० मिलिग्रामभन्दा बढी नहुने गरी सेवन गर्न सकिने वैज्ञानिक आधार प्रस्तुत गरेका छन्। त्यस हिसाबले नेपालमा उत्पादित इनर्जी ड्रिङ्क्समा प्रयोग गरिएको क्याफिनको मात्रा उक्त दैनिक सीमाको २५ प्रतिशतभन्दा कम रहेको विभागको भनाइ छ।
उत्पादक तथा विक्रेताले प्रचलित कानुनअनुसार आवश्यक अनुमति लिएर मात्र विज्ञापन तथा प्रचारप्रसार गर्नुपर्ने र उत्पादनको लेबलमा उल्लेख गरिएका चेतावनी सन्देश तथा सुरक्षित उपभोगसम्बन्धी जानकारी स्पष्ट रूपमा सम्प्रेषण गर्नुपर्ने विभागले भनेको छ। खाद्य स्वच्छता तथा गुणस्तर कायम गर्ने कार्यलाई प्राथमिकतामा राख्दै वैज्ञानिक तथ्य र अन्तर्राष्ट्रिय मापदण्डका आधारमा खाद्य पदार्थको गुणस्तरबारे जानकारी दिन सरोकारवालालाई अनुरोध गरिएको छ। खाद्य स्वच्छता तथा गुणस्तर ऐन, २०८१ विपरीत कार्य गर्ने व्यवसायीलाई कानुनअनुसार कारबाही गरिने विभागले जनाएको छ।
