अमेरिकाका ६ जना डेमोक्रेटिक सांसदले भारतमा प्रदर्शनका क्रममा भएको भनिएको मानवाधिकार उल्लङ्घनप्रति गम्भीर चासो जनाएका छन्। प्रमिला जयपाल, इल्हान उमर, जिम म्याकगभर्न, रशीदा तलीब, एलेनोर होम्स नर्टन र जिसस गार्सियाले अमेरिकी विदेश मन्त्री मार्को रुबियोलाई शुक्रबार एउटा पत्र लेखेका हुन्। उनीहरूले रुबियोलाई आफ्नो आगामी भारत भ्रमणका बेला भारतीय अधिकारीहरूसँग यो विषय उठाउन र पारदर्शी तथा स्वतन्त्र छानबिन सुरु गर्न दबाब दिन आग्रह गरेका छन्।
पत्रमा दिल्लीसहित भारतका विभिन्न ठाउँमा छात्र प्रदर्शनका क्रममा सुरक्षा बलले अत्यधिक बल प्रयोग गरेको, मानिसहरूलाई गलत तरिकाले हिरासतमा लिएको र दमनका घटना बाहिर आएको दाबी गरिएको छ। सांसदहरूले हिरासतमा रहेकाहरूलाई तत्काल रिहा गर्न पनि माग गरेका छन्। उनीहरूले अमेरिकाका विभिन्न सहरमा रहेका भारतीय दूतावास र कन्सुलेटमाथि प्रदर्शनकारीहरूको निगरानी गर्न फोटोग्राफर खटाएको आरोप पनि लगाएका छन्।
पत्रमा तत्कालीन शिक्षा मन्त्री धर्मेन्द्र प्रधानविरुद्ध भएको प्रदर्शन र मुख्य निर्वाचन आयुक्त ज्ञानेश कुमारको राजीनामाको माग गर्दै भएका प्रदर्शनलाई अत्यधिक बल प्रयोगका उदाहरणका रूपमा उल्लेख गरिएको छ। मतदाता सूचीबाट १३ करोड मतदाताको नाम हटाइएको विषयमा जयपालले चिन्ता व्यक्त गरेकी छन्।
यसैबीच अमेरिकाका लागि भारतका राजदूत विनयमोहन क्वात्राले जयपालको टिप्पणीको कडा आलोचना गर्दै यसलाई भारतको आन्तरिक मामिलामा अस्वीकार्य हस्तक्षेप भनेका छन्। रुबियो मुम्बईमा भारतीय विदेश मन्त्री एस जयशंकरसँग भेटघाट गर्ने कार्यक्रम छ।
