विद्यालयको जीर्ण भौतिक संरचना, कर्मचारी अभाव र बढ्दो महँगीका विरुद्ध शनिबार फ्रान्सभरि भएको प्रदर्शनले उग्र रूप लिँदा ठूलो जनधनको क्षति भएको छ। यसक्रममा करिब १ हजार २ सय जना पक्राउ परेका छन् भने १५० प्रहरी घाइते भएका छन्।
फ्रान्सेली सरकारका अनुसार देशभर करिब साढे पाँच लाख नागरिक प्रदर्शनमा सहभागी भएका थिए। पेरिससहित विभिन्न सहरमा आगजनी, तोडफोड र लुटपाटका घटनाहरू भएका छन्। पेरिसमा साँझसम्म प्रदर्शनकारी र प्रहरीबीच झडप हुँदा प्रहरीले भीड तितरबितर पार्न अश्रुग्यास र पानीको फोहोरा प्रयोग गर्यो।
लिमोज सहरको नगर भवनमा लागेको ठूलो आगोका कारण भवनको छानाको केही भाग भत्किएको छ। लियोनको पर्यटकीय सूचना केन्द्रमा समेत आगजनी हुँदा मेयरले यसलाई सहरका लागि दुःखद घटना भनेका छन्। लिलेमा एउटा एप्पल पसलमा तोडफोड गरी सामान लुटियो भने प्लास द ला रिपब्लिकमा सवारीसाधन जलाइए। सेन्ट-इटियनमा ग्रिनेड विस्फोटमा एक युवकको हात चुँडिएको मेयरले जनाएका छन्।
प्रधानमन्त्री सेबास्टियन लेकोर्नुले प्रदर्शनलाई आगामी राष्ट्रपति निर्वाचनको तयारीका रूपमा प्रयोग गर्न खोजिएको आरोप लगाउँदै हिंसामाथि कडा कानुनी कारबाही हुने बताएका छन्। राष्ट्रपति इमानुएल म्याक्रोंले सरकारी कार्यालय, व्यवसाय र नगर भवनमा आक्रमण गर्नेहरूलाई नछोड्ने बताएका छन्।
