दसैँको मुखमा कोशी प्रदेशमा मासुको उत्पादन उत्साहजनक रूपमा बढिरहे पनि उपभोक्ताले भने मासु किन्न चर्को मूल्य तिर्नुपरेको छ।
नेपाल राष्ट्र बैंकले तीन दिनअघि सार्वजनिक गरेको आर्थिक वर्ष २०८२/८३ को कोशी प्रदेशको आर्थिक प्रतिवेदनअनुसार प्रदेशमा मासु उत्पादन ०.२ प्रतिशतले बढेर ७५ हजार ३ सय ७० मेट्रिक टन पुगेको छ। १४ जिल्लामध्ये मोरङले १६.५ प्रतिशत (१२,४५१ मेट्रिक टन), झापाले १४.५ प्रतिशत र सुनसरीले १३.६ प्रतिशत मासु उत्पादन गरेका छन्। माछा र दूध उत्पादनमा पनि मोरङ नै अग्रस्थानमा छ।
तर उत्पादन बढे पनि चाडपर्वको मौका छोपेर बजारमा मनपरी मूल्य असुल्ने क्रम रोकिएको छैन। जिल्ला प्रशासन कार्यालय सुनसरीले गत असोज २९ मा खसी/बोकाको मासुको अधिकतम खुद्रा मूल्य प्रतिकेजी एक हजार एक सय रुपैयाँ तोकेको थियो भने मोरङले असोज ३० मा प्रतिकेजी एक हजार दुई सय रुपैयाँ कायम गरेको थियो। मूल्यसूची टाँस्नुपर्ने र बिल अनिवार्य गर्ने निर्णयसमेत भएको थियो।
तर निर्णय सार्वजनिक भएको २४ घण्टा नबित्दै व्यापारीले प्रतिकेजी एक हजार चार सय रुपैयाँसम्म असुलेका छन्। विराटनगरका लक्ष्मी सापकोटाले कञ्चनबारीको चौधरी मासु पसलमा १४ सय तिरेको र मासुमा बोसो–हड्डी मिसाइएको बताएका छन् भने विराटनगर–१२ का अनिल यादवले १३ सय तिरेको सुनाएका छन्। प्रशासनको फितलो अनुगमनका कारण बिचौलिया हाबी भएको देखिन्छ।
ग्रामीण बजारमा भने मूल्य केही कम छ — कानेपोखरी–५ भौंसाबारीमा प्रतिकिलो एक हजार र रमाइलो बजारमा १२ सय रुपैयाँ रहेको स्थानीयले बताएका छन्।
