काठमाडौंबाट पूर्वतर्फ गुडिरहेको एउटा जीप सिन्धुलीमा दुर्घटनामा पर्दा तीन जना महिलाको ज्यान गएको छ भने चार जना घाइते भएका छन्।
फिक्कल गाउँपालिका–६ नागथानस्थित मध्यपहाडी लोकमार्गमा आइतबार बिहान करिब साढे २ बजेतिर को. १ ज २९७६ नम्बरको जीप सडकबाट करिब दुई सय मिटर तल सुनकोशी नदीमा खसेको जिल्ला प्रहरी कार्यालय सिन्धुलीले जनाएको छ।
दुर्घटनास्थलमा तीन जना महिलाका शव फेला परेको र ती महिलाको पहिचान हुन नसकेको डिएसपी विजय श्रेष्ठले जानकारी दिए। दुर्घटनामा चालकसहित चार जना घाइते भएका छन्।
घाइते हुनेमा ओखलढुंगाका २९ वर्षीय चालक आशिष विष्ट, खोटाङकी ३८ वर्षीया सम्झना राई, सम्झनाकी १२ वर्षीया छोरी सिवानी र १३ वर्षीय अंकित विक रहेका छन्। सम्झनाको अवस्था गम्भीर रहेको प्रहरीले बताएको छ।
प्रहरीले उद्धार गरी घाइतेलाई उदयपुरको घुर्मीस्थित जनसेवा हेल्थ सेन्टर प्रा.लि.मा उपचार गराइरहेको छ। चालकका अनुसार जीपमा अझै तीन जना हराइरहेका छन्। इलाका प्रहरी कार्यालय खुर्कोटको टोली खोजी तथा उद्धारमा खटिएको डिएसपी श्रेष्ठले बताए।
