काठमाडौं — श्रम, रोजगार तथा सामाजिक सुरक्षा मन्त्रालयले मलेसियामा रोजगारीसँग जोडिएका विषयमा अपुष्ट र गलत जानकारी सार्वजनिक नगर्न सबैलाई अनुरोध गरेको छ। बुधबार विज्ञप्ति निकाल्दै मन्त्रालयले पछिल्ला दिनमा सञ्चारमाध्यम र सामाजिक सञ्जालमा त्यस्ता जानकारी फैलिइरहेको भन्दै चासो व्यक्त गरेको हो।
वैदेशिक रोजगारी अत्यन्त संवेदनशील क्षेत्र भएकाले प्रमाण नपुगेका कुराले सर्वसाधारण र सरोकारवालामा अन्योल बढाउन सक्ने मन्त्रालयको भनाइ छ। त्यसैले यस विषयमा यथार्थमा आधारित जानकारी मात्रै सम्प्रेषण गर्न मन्त्रालयले आग्रह गरेको छ।
मन्त्रालयका अनुसार मलेसिया रोजगारीको पछिल्लो अवस्थाबारे मलेसिया सरकारका सम्बन्धित निकायसँग निरन्तर कूटनीतिक संवाद भइरहेको छ। यो संवाद देशको श्रम तथा रोजगार नीति, वैदेशिक रोजगार ऐन र नियमावली, दुई देशबीचको श्रम सम्झौता र अन्तर्राष्ट्रिय कानुनको दायराभित्र रहेर अघि बढाइएको मन्त्रालयले जनाएको छ। दुवै पक्षबीचको छलफलबाट विषय छिट्टै टुंग्याउने पक्षमा सरकार रहेको पनि विज्ञप्तिमा उल्लेख छ।
संविधान, प्रचलित कानुन र श्रम सम्झौतासँग नमिल्ने कुनै पनि प्रणालीले श्रमिकको दीर्घकालीन हित रक्षा गर्न नसक्ने मन्त्रालयको ठहर छ। नेपाली श्रमिकको हितलाई केन्द्रमा राखेर नेपाल र मलेसियाबीचको श्रम आप्रवासन व्यवस्थित, पारदर्शी, न्यायोचित र दुवै पक्षको हितमा आधारित बनाउन सरकार प्रतिबद्ध रहेको विज्ञप्तिमा भनिएको छ। कामदार छनोट र भर्ना प्रक्रिया निष्पक्ष बनाउने विषयमा पनि सरकार सचेत रहेको मन्त्रालयले स्पष्ट पारेको छ।
