नेपाली चलचित्र क्षेत्रका चर्चित अभिनेता दीपकराज गिरीले केही वर्षअघिसम्म ‘महानायक’ भन्ने शब्द सुन्नासाथ आफूलाई असहज हुने गरेको बताएका छन्। हालै एक पोडकास्टमा उनले त्यस बेलाको अनुभव सुनाउँदै उक्त शब्दले आफूलाई लखेटेजस्तो लाग्ने गरेको बताए।
दीपकराजका अनुसार कसैले ‘महानायक’ भनेर बोलाउँदा उनको मन हल्लिन्थ्यो र प्यानिक अट्याक आउला जस्तो हुन्थ्यो। अरू नै प्रसङ्गमा कसैले उक्त शब्द उच्चारण गर्दा पनि उनी झसङ्ग हुने गर्थे।
तर, यो शब्दसँग उनको सम्बन्ध आफैंले बनाएको भने होइन। उनले आफूलाई कहिल्यै महानायक घोषणा गरेका थिएनन् र कुनै अन्तर्वार्तामा त्यसको दाबी पनि गरेका थिएनन्। अभिनेत्री दीपाश्री निरौलाले दिएको एउटा अन्तर्वार्तापछि उठेको आलोचनाको लहरले दीपाश्रीलाई त भावनात्मक चोट पुर्यायो नै, त्यसको रापले टाढा रहेका दीपकराजलाई पनि नराम्ररी पोल्यो।
त्यसपछि मानिसहरूले उनलाई ‘ओ महानायक’ भनेर जिस्क्याउन थाले। त्यो सम्मानको सम्बोधन नभई दिल्लगी थियो। एकपटक यात्राका क्रममा बाटोमा खाना खान रोकिँदा एक अपरिचितले उनलाई देख्नासाथ ‘अहो, महानायक ?’ भन्दा उनी नराम्ररी तर्सिएका थिए।
दीपकराज अहिले आफ्नो नयाँ चलचित्र ‘छ माया छपक्कै–२’ को प्रदर्शनमा व्यस्त छन्। सामाजिक विषयवस्तुमा आधारित उक्त चलचित्र दोस्रो सातामा प्रदर्शनरत छ।
