सूचना तथा सञ्चारमन्त्री डा. विक्रम तिमिल्सिनाले विपद्को समयमा पनि सञ्चार सेवा निरन्तर चलिरहोस् भन्ने उद्देश्यले बलियो पूर्वाधार र विश्वव्यापी सहकार्य अपरिहार्य रहेको बताएका छन्। कतारको राजधानी दोहामा जारी अन्तर्राष्ट्रिय दूरसञ्चार सङ्घको सन् २०२६ को पूर्णाधिकार सम्मेलनअन्तर्गत आयोजित उच्चस्तरीय छलफलमा नेपाली प्रतिनिधिमण्डलको नेतृत्व गर्दै उनले यस्तो धारणा राखेका हुन्।
उक्त छलफलमा मन्त्री तिमिल्सिनाले हालै भोटेकोशी–त्रिशूली नदी क्षेत्रमा आएको आकस्मिक बाढीले नेपालको सञ्चार पूर्वाधारमा पुर्याएको क्षतिबारे सहभागीहरूलाई जानकारी गराए। उक्त बाढीले जनधनको ठूलो नोक्सानी गर्नुका साथै मुलुकका विभिन्न भूभागमा सञ्चार सेवा ठप्प भएको उनले बताए।
उनले विपद् सामना गर्न सक्ने सञ्चार प्रणाली बनाउन यसअघि गरिएका वाचाहरूलाई ठोस र नाप्न सकिने काममा बदल्नुपर्नेमा जोड दिए। साथै, सबै नागरिकको पहुँचमा पुग्ने गरी उत्थानशील सञ्चार सेवा सस्तो बनाउनुपर्ने र मुलुकहरूबीचको सहकार्यलाई अझ बलियो बनाउनुपर्ने प्रस्ताव पनि उनले अघि सारे।
सम्मेलनकै क्रममा मन्त्री तिमिल्सिनाले मलेसियाका सञ्चारमन्त्री दातुक सेरी फहमी फाजिलसँग छुट्टै भेटवार्ता गरेका छन्। भेटमा नेपालले डिजिटल रूपान्तरणलाई गति दिन चालेका कदमबारे जानकारी गराउँदै दुवै पक्षले डिजिटल सम्पर्क विस्तार, क्षमता विकास, डिजिटल विश्वासको वातावरण र बहुपक्षीय मञ्चमा सहकार्य बढाउने विषयमा छलफल गरेका थिए।
दोहास्थित नेपाली राजदूतावासका अनुसार मन्त्री तिमिल्सिनाले सम्मेलनको पूर्णसत्रलाई आज सम्बोधन गर्ने कार्यक्रम छ।
