बिहीबार रातिदेखि निरन्तर परिरहेको झरी शनिबार दिउँसोपछि क्रमशः कम हुँदै जाने मौसमविद्हरूले बताएका छन्। बंगालको खाडीमा बनेको अर्नब चक्रवात भारतीय भूभागमा प्रवेश गरेपछि कमजोर भए पनि त्यसको अवशेष र जलवाष्प नेपालतर्फ आइपुग्दा देशका धेरै ठाउँमा वर्षा भएको हो।
जल तथा मौसम विज्ञान विभागका मौसमविद् रोजन लामिछानेका अनुसार शनिबार दिउँसो २–३ बजेदेखि वर्षा घट्दै जानेछ र साँझसम्म धेरैजसो ठाउँमा यसको प्रभाव कम हुनेछ। अहिले सबै ठाउँमा समान वर्षा भइरहेको छैन — सुदूरपश्चिमका तराई र पहाडी क्षेत्र तथा कोशी प्रदेशका तराईमा वर्षा निकै कम भइसकेको छ भने मध्यपश्चिमका केही ठाउँमा मात्र छिटपुट पानी परेको छ।
बागमती, गण्डकी र लुम्बिनी प्रदेशका पूर्वी भूभाग तथा कर्णालीका पहाडी र हिमाली क्षेत्रमा भने अझै वर्षा जारी छ। त्रिभुवन विश्वविद्यालयको जल तथा मौसम विज्ञान केन्द्रीय विभागका सहप्राध्यापक डा. विनोद पोखरेलका अनुसार झरी ३६ घन्टाभन्दा बढी समयदेखि परिरहेको छ र शनिबार दिउँसो १–२ बजेसम्म देशका धेरै ठाउँमा पानी पर्नेछ। काठमाडौंमा पनि करिब २ बजेसम्म वर्षा हुने उनको पूर्वानुमान छ।
पछिल्लो चौबीस घण्टामा सबैभन्दा धेरै वर्षा मनाङको तालमा १२२ मिलिमिटर मापन भएको छ। मनाङकै तिल्चेमा ६६.२, लमजुङको भुजुङमा ८९.२, तनहुँको दमौलीमा ८३.४, गोरखाको सखरमा ८८.८ र चितवनको भरतपुरमा ८४.८ मिलिमिटर पानी परेको छ। नवलपुरको दमकौलीमा ८४.२ र देउरालीमा ९०.४ तथा पर्साको ठोरीमा ७५.८ मिलिमिटर वर्षा मापन भएको छ। काठमाडौं उपत्यकाका बबरमहलमा ५१.२ र गोदावरीमा ५३ मिलिमिटर वर्षा भएको छ।
मौसमविद् लामिछानेका अनुसार आइतबारदेखि मौसम खुलेर घाम लाग्ने सम्भावना छ।
