काठमाडौँ — त्रिभुवन विश्वविद्यालयले चालु आर्थिक वर्षमा आफ्ना शिक्षक तथा कर्मचारीको क्षमता विकासका लागि एक करोड २५ लाख रुपैयाँ बजेट छुट्याएको छ। उक्त रकमबाट विश्वविद्यालयका सात सय पचहत्तर शिक्षक तथा कर्मचारीलाई सेवाकालीन तथा सेवा प्रवेश तालिम दिइनेछ।
विश्वविद्यालयको समन्वय महाशाखाले शुक्रबार आयोजना गरेको जनशक्ति विकास तथा कल्याण परिषद्को वार्षिक बैठकले नौ वटा शीर्षकमा तालिम सञ्चालन गर्ने कार्यक्रमसहित बजेट पारित गरेको हो।
शिक्षाध्यक्ष प्रा डा अञ्जना सिंहको अध्यक्षतामा बसेको बैठकले विश्वविद्यालय सेवामा नयाँ प्रवेश गर्ने शिक्षक तथा कर्मचारीलाई सङ्गठनात्मक संरचना, कार्यप्रणाली, आचारसंहिता तथा अधिकार र कर्तव्यबारे अभिमुखीकरण गर्ने निर्णय गरेको छ।
त्यसैगरी प्रशासनिक कर्मचारीका लागि आवश्यकता पहिचानमा आधारित क्षमता अभिवृद्धि तालिम, नेतृत्व तहका पदाधिकारी, क्याम्पस प्रमुख, विभागीय प्रमुख तथा प्रशासनिक नेतृत्वको व्यवस्थापकीय क्षमता विकास गर्ने कार्यक्रम पनि स्वीकृत भएका छन्। कृत्रिम बुद्धिमत्ता, सूचना प्रविधि प्रणाली तथा कार्यालय सञ्चालनसम्बन्धी दक्षता बढाउने तालिमसमेत सञ्चालन गरिने त्रिविले जनाएको छ।
