मकवानपुर — चक्रवात अर्नवको प्रभावले कुलेखानी जलाशयको जलाधार क्षेत्रमा शुक्रबारदेखि परेको वर्षा शनिबार पनि जारी छ। निरन्तरको वर्षासँगै जलाशयको पानीको सतह उकालो लागिरहेको छ। जिल्ला प्रशासन कार्यालय मकवानपुरका अनुसार शनिबार दिउँसोसम्म सतह एक हजार पाँच सय अठ्ठाइस मिटरभन्दा माथि पुग्ने अनुमान छ।
प्रमुख जिल्ला अधिकारी वसन्त अधिकारीले शनिबार बिहानसम्म सतह एक हजार पाँच सय सत्ताइस दशमलव छ छ मिटर पुगेको जानकारी दिए। बिहान ६ बजे एक हजार पाँच सय सत्ताइस दशमलव चार दुई मिटर रहेको सतह दुई घण्टामा एक हजार पाँच सय सत्ताइस दशमलव पाँच शून्य मिटर पुगेको थियो।
जल तथा मौसम विज्ञान विभागको पूर्वानुमानअनुसार आज दिउँसो २ बजेसम्म मध्यम वर्षा जारी रहने र त्यसपछि मात्र मौसम खुल्ने देखिएको छ। सतह बढ्दै गएपछि नदी तटीय क्षेत्रका बासिन्दालाई उच्च सतर्कता अपनाउन प्रशासनले आग्रह गरेको छ।
पानीको चाप व्यवस्थापन गर्न नेपाल विद्युत् प्राधिकरणले कुलेखानीका तीनवटै युनिट पूर्ण क्षमतामा चलाएको छ। पहिलो युनिटबाट ६०, दोस्रोबाट ३२ र तेस्रोबाट १४ गरी कुल एक सय छ मेगावाट विद्युत् चौबीसै घण्टा उत्पादन भइरहेको छ। यसरी दैनिक करिब ४० देखि ५० सेन्टिमिटर पानी खपत हुने कुलेखानी प्रथम जलविद्युत् आयोजनाका प्रमुख प्रल्हाद राउतले बताए।
जलाशयको अधिकतम भण्डारण क्षमता समुद्र सतहबाट एक हजार पाँच सय तीस मिटर हो। भरिन अझै करिब साढे दुई मिटर बाँकी रहेकाले तत्काल बाँध खोल्नुपर्ने अवस्था नरहेको आयोजनाले जनाएको छ। आवश्यक परे बाँधमा बालुवाका बोरा राखेर थप ५० सेन्टिमिटरसम्म पानी जम्मा गर्न सकिने राउतको भनाइ छ। असोजमा जस्तो अत्यधिक भारी वर्षा नभएकाले जलाशय तत्काल भरिने सम्भावना नरहेको उनले बताए। भरिने अवस्था आए तल्लो तटीय क्षेत्रका नागरिकलाई पूर्वसूचना दिएर मात्र बाँध खोलिने आयोजनाको भनाइ छ। बाढीको पूर्वसूचनाका लागि सिस्नेरीलगायत तल्लो तटीय क्षेत्रमा साइरन जडान गरिएको छ। सतह एक हजार पाँच सय उनन्तीस मिटर पुग्नेबित्तिकै पहिलो साइरन बज्ने व्यवस्था छ।
