लगातारको वर्षापछि आएको बाढी र पहिरोले देशभरका १२ भन्दा बढी सडकखण्ड ठप्प भएका छन्। प्रहरी प्रधान कार्यालयका अनुसार शनिबार बिहानसम्म मुलुकका विभिन्न ठाउँमा सडक अवरुद्ध हुँदा लामो तथा छोटो दूरीका यात्रुहरू प्रभावित भएका छन्।
धादिङको गजुरी गाउँपालिका–२, परेवाभिरमा माथिबाट पहिरो खसेपछि पृथ्वी राजमार्ग दुवैतर्फबाट पूर्ण रूपमा बन्द भएको छ। निरन्तर वर्षाका कारण सडकमा ठूलो मात्रामा माटो र ढुङ्गा थुप्रिएपछि सवारी आवागमन रोकिएको हो।
त्यस्तै, काभ्रेको रोशी गाउँपालिका–९, पिनथली र वडा नम्बर ८, गिम्दीबेँसीमा खहरेखोलाबाट ढुङ्गामाटो र लेदो बगेर आएपछि बिहान ४ः५५ बजेदेखि बिपी राजमार्ग पनि बन्द भएको छ। सुर्खेतको बराहताल गाउँपालिका–७, औलिसेमा सुख्खा पहिरो खस्दा कर्णाली राजमार्ग अवरुद्ध भएको छ भने खोटाङ खण्डमा मध्यपहाडी राजमार्ग पनि बन्द भएको छ।
ललितपुरमा बागमती खोला करिडोर र कान्तिलोकपथका विभिन्न खण्डमा पानीको बहाव बढेपछि आवागमन रोकिएको छ। बल्खु–सुन्दरीघाट क्षेत्रमा बाढीको पानी सडकमा पसेपछि सवारीसाधन चल्न सकेका छैनन्।
यसैबीच, गुल्मीको कालीगण्डकी गाउँपालिका–२, राक्से र पाल्पाको रामपुर नगरपालिका–१, कासिबनमा पहिरो खसेपछि कालीगण्डकी कोरिडोरका दुई खण्ड बन्द भएका छन्। मुगुको छाँयानाथ रारा नगरपालिका–७, ताल्चास्थित नाग्म–गमगढी सडकखण्ड पनि अवरुद्ध भएको प्रहरीले जनाएको छ।
अवरुद्ध सडकहरू खुलाउन सम्बन्धित निकायले काम गरिरहेको प्रहरी प्रधान कार्यालयले जानकारी दिएको छ।
