चालु आर्थिक वर्ष २०८३/८४ को पहिलो तीन महिनामा एनएमबि बैंक लिमिटेडले १ अर्ब १६ करोड रुपैयाँ खुद नाफा आर्जन गरेको छ। गत आर्थिक वर्षको यही अवधिमा बैंकले ९१ करोड ६० लाख रुपैयाँ नाफा कमाएको थियो। यस हिसाबले बैंकको नाफा २७.११ प्रतिशतले बढेको हो।
नाफा बढेसँगै बैंकको प्रतिसेयर आम्दानीमा पनि सुधार देखिएको छ। वार्षिकीकरण गरिएको प्रतिसेयर आम्दानी २५.४२ प्रतिशतले बढेर २३ रुपैयाँ ८३ पैसा पुगेको छ। सेयरधनीलाई बाँड्न मिल्ने प्रतिसेयर नाफा भने ४३.८८ प्रतिशतले बढेर ११ रुपैयाँ ६४ पैसा पुगेको छ।
यस अवधिमा बैंकको कर्जा र निक्षेप दुवै विस्तार भएका छन्। कुल कर्जा ८ अर्ब ९ करोड रुपैयाँले बढेर २ खर्ब ७६ अर्ब ४ करोड रुपैयाँ पुगेको छ भने कुल निक्षेप ६ अर्ब ३ करोड रुपैयाँले बढेर ३ खर्ब २४ अर्ब रुपैयाँ पुगेको छ। बैंकको कर्जा वृद्धिदर समग्र बैंकिङ उद्योगको औसतभन्दा माथि रहेको छ।
कर्जाको गुणस्तरमा पनि सुधार आएको छ। खराब कर्जाको अनुपात अघिल्लो त्रैमासको ४.९७ प्रतिशतबाट घटेर ४.९२ प्रतिशतमा झरेको छ। बैंकको सञ्चालन नाफा २६.१७ प्रतिशतले बढेर १ अर्ब ८९ करोड रुपैयाँ पुगेको छ। सम्भावित नोक्सानी व्यवस्थापन खर्च २९.६६ प्रतिशतले घटेर ५० करोड २१ लाख ८० हजार रुपैयाँमा सीमित भएको छ। बैंकको पुँजी कोष अनुपात १२.५३ प्रतिशत रहेको छ।
