काठमाडौँ । नेपाली कांग्रेसका संसदीय दलका नेता भीष्मराज आङदेम्बेले समाचार प्रकाशनकै कारण पत्रकार पक्राउ गर्नु र सञ्चारगृहमा प्रहरी हस्तक्षेप गर्नु लोकतन्त्रविरुद्धको कार्य भएको बताएका छन्।
शनिबार जारी गरेको प्रेस वक्तव्यमा आङदेम्बेले पत्रकार पक्राउ गर्ने, सञ्चारमाध्यमको ढोकामा प्रहरी गाडी तेर्स्याउने र समाचार कक्षमै प्रहरी पठाएर तर्साउने गतिविधिको कडा शब्दमा विरोध गरेका हुन्।
वक्तव्यमा अदालतमा बिचौलियामार्फत मिलेमतो भएको विषयमा प्रधानमन्त्री, प्रधानन्यायाधीश, न्यायाधीश र सत्तापक्षीय सांसदको नाम जोडिएर समाचार सार्वजनिक भइरहेको उल्लेख छ। उच्च सरकारी अधिकारीलाई सेवाबाट हटाउन लागिएको र कर्मचारीलाई प्रधानमन्त्री कार्यालयमा थुनेर काममा बाधा पुर्याइएको उनले जनाएका छन्।
यी विषय सार्वजनिक गर्ने पत्रकारमाथि पक्राउ पुर्जीबिनै धरपकड गरिएको र कोही पत्रकारलाई साइबर ब्युरोमा बोलाइएको भन्दै आङदेम्बेले नेपालमा समाचार लेख्ने वातावरण साँघुरिँदै गएको बताए। यसबाट सरकार प्रश्नभन्दा माथि रहेको देखिएको उनको भनाइ छ।
प्रधानमन्त्रीको सचिवालय बेखबर र गृह प्रशासन अनभिज्ञ रहेको तर पक्राउ परेका पत्रकारले प्रधानमन्त्री कार्यालयकै दबाबमा पक्राउ गरिएको प्रहरी अधिकारीले बताएको दाबी गरेको वक्तव्यमा उल्लेख छ।
प्रधानमन्त्रीको निर्देशन र सरकारका प्रत्येक कार्य कानुनसम्मत हुनुपर्नेमा आङदेम्बेले जोड दिएका छन्। कानुनी राज्यको पालना गर्नु प्रधानमन्त्रीको समेत कर्तव्य रहेको र छानबिनका प्रत्येक विषय कानुनसम्मत हुनुपर्ने उनले बताए। स्थापित निकायहरूलाई स्वतन्त्र रूपमा काम गर्न दिनुपर्ने उनको भनाइ छ।
पत्रकारलाई पक्राउ गरेर न त समाचारको सत्य मार्न सकिने न त प्रेसलाई कुनै निरङ्कुशताका सामु घुँडा टेकाउन सकिने उनले व्यक्त गरे। संविधानले दिएका स्वतन्त्रता र कानुनी राज्यका विरुद्ध भएका यी कार्यहरूप्रति गम्भीर ध्यानाकर्षण भएको जनाउँदै उनले सरकार र राज्यका निकायहरूलाई कानुनसम्मत काम गर्न आह्वान गरेका छन्।
