महाभारतका पात्रलाई आधुनिक नेपाली समाजको पृष्ठभूमिमा उतारेर बनाइएको फिल्म ‘पाँच पाण्डव’ प्रदर्शनअघि नै विवादको घेरामा परेको छ। फिल्मको नयाँ गीत सार्वजनिक भएपछि द्रौपदीको चरित्र प्रस्तुत गर्ने तरिकामाथि सामाजिक सञ्जालमा चर्को आलोचना सुरु भएको हो। कतिपय दर्शकले यसलाई धार्मिक आस्थामाथिको अपमान भनेका छन् र फिल्म बहिष्कार गर्नुपर्ने मागसमेत उठाएका छन्।
शुक्रबार सार्वजनिक भएको गीत ‘राजा चाहिया छ’ को भिडियोमा द्रौपदीको भूमिकामा देखिएकी इभा गिरी क्यासिनोमा बोल्ड अवतारमा नृत्य गरिरहेको दृश्य छ। सोही दृश्यमा युधिष्ठिरको भूमिकामा रहेका हरिवंश आचार्य पनि तास खेल्दै नाचिरहेका देखिन्छन्। महाभारतमा द्रौपदीलाई स्वाभिमान, आत्मसम्मान र संघर्षको प्रतीकका रूपमा चित्रण गरिएको छ। त्यसैले उनलाई बार नृत्यको शैलीमा देखाउनु धार्मिक तथा सांस्कृतिक मर्यादाविपरीत भएको दर्शकको गुनासो छ। हिन्दू धर्मकी अभियन्ता बेदिका केसीले पनि सामाजिक सञ्जालमार्फत विरोध जनाउँदै बहिष्कारको माग गरेकी छन्।
वसन्त निरौलाको निर्देशनमा बनेको फिल्ममा हरिवंश आचार्य, आर्यन सिग्देल, जितु नेपाल, महेश त्रिपाठी र सुशील सिटौला पाँच पाण्डवको भूमिकामा छन् भने इभा गिरी द्रौपदी बनेकी छन्। रोचक कुरा, निर्माण टिमले यसअघि पाँच कलाकारलाई पाण्डव र इभालाई द्रौपदीका रूपमा चिनाउँदै पोस्टर सार्वजनिक गर्दा कुनै विवाद देखिएको थिएन। ‘दाजुभाइजस्ता हुँदैनन् अरु’ गीत सार्वजनिक हुँदासम्म पनि फिल्म सामान्य चर्चामै थियो।
बढ्दो आलोचनाबीच निर्देशक निरौलाले फिल्मलाई धार्मिक कथाका रूपमा बुझ्न नहुने बताएका छन्। उनका अनुसार महाभारतका पात्रलाई प्रतीकका रूपमा प्रयोग गरेर वर्तमान नेपाली समाजको कथा प्रस्तुत गरिएको हो। फिल्मले सनातन धर्म वा कुनै धार्मिक आस्थामाथि प्रहार नगरेको उनको दाबी छ। उनले दर्शकलाई फिल्म प्रदर्शन नभएसम्म पर्खिन आग्रह गरेका छन्।
महाभारतका पात्रलाई आधुनिक परिवेशमा प्रस्तुत गर्नु सिर्जनात्मक स्वतन्त्रता हो कि धार्मिक संवेदनशीलतामाथिको बेवास्ता भन्ने बहस चलिरहेको छ। यही बहसका बीच फिल्मप्रति दर्शकको चासो बढेको छ।
