रौतहटको फतुवा विजयपुर नगरपालिका–६ पेटभर्वामा रहेको एभरेस्ट फाइबर सिमेन्ट बोर्ड प्रालिमा काम गर्ने क्रममा मेसिनले च्यापिएर एक मजदुरको मृत्यु भएको छ।
मृत्यु हुनेमा महोत्तरीको मनरासिसवा नगरपालिका–३ सनौल निवासी ३० वर्षीय रमेश चौधरी छन्। सोमबार बिहान करिब ११ः३० बजे उद्योगमा रहेको थ्री स्टेसन मेसिनमा च्यापिएर उनी गम्भीर घाइते भएका थिए।
घाइते चौधरीलाई तत्काल उपचारका लागि दिउँसो करिब १ बजे बाराको परवानीपुरस्थित एलएस न्युरो अस्पताल पुर्याइएको थियो। अस्पतालमा चिकित्सकले जाँच गर्दा दिउँसो १ बजेर ६ मिनेटमा उनलाई मृत घोषणा गरेका थिए। मृतकको शव सोही अस्पतालमा राखिएको छ।
घटनाको जानकारी पाएपछि इलाका प्रहरी कार्यालय लक्ष्मिनिया विजयपुरबाट प्रहरी निरीक्षक रादेशकुमार खत्रीको कमान्डमा पाँच जनाको टोली घटनास्थल पुगेको थियो। त्यस्तै इलाका प्रहरी कार्यालय सन्तपुरबाट समेत चार जनाको प्रहरी टोली खटिएको छ।
उद्योगमा सँगै काम गर्ने सन्तोष कुमार दास उपचार प्रक्रियामा संलग्न रहेको प्रारम्भिक विवरणमा उल्लेख छ। मजदुरको मृत्यु हुनुको वास्तविक कारण र घटनाको परिस्थितिबारे थप अनुसन्धान भइरहेको प्रहरीले जनाएको छ।
