सम्पत्ति शुद्धीकरणको आरोपमा हिरासतमा रहेका बिचौलिया इनम सापकोटाले पूर्वप्रधान न्यायाधीश चोलेन्द्र शमशेर जबरालाई नै आफ्नो मामिलाको मुख्य योजनाकार भएको बयान दिएका छन्। आफू केवल प्रयोग भएको उनको दाबी छ।
इनम अहिले जिल्ला प्रहरी परिसर काठमाडौँको हिरासतमा छन्। जबरासँगको सम्बन्ध देखिएपछि प्रहरीको विशेष ब्यूरोले उनलाई असोज १४ मा पक्राउ गरेको थियो। उनीसँग सम्पर्कमा रहेका लगानी बोर्डका पूर्वप्रमुख कार्यकारी अधिकृत सुशील भट्टलाई पनि प्रहरीले पक्राउ गरी अनुसन्धान गरिरहेको छ।
व्यवसायी दीपक भट्ट र सुलभ अग्रवालको मुद्दा अदालतमा विचाराधीन छ। त्यसमा चलखेल भएको आशंकामा प्रधानमन्त्री बालेन शाहको निर्देशनमा असोज ११ मा जबरा पक्राउ परेका थिए। तर मुद्दा चलाउन मिल्ने प्रमाण नभेटिएपछि उनी रिहा भएका थिए।
प्रहरीसँगको सोधपुछमा इनमले जबरा र उनको समूहले नै आफूलाई विभिन्न ‘सेटिङ’मा प्रयोग गरेको बताएका छन्। जबराले आफ्नो टिमका न्यायाधीशहरूमार्फत मुद्दामा मिलेमतो गर्ने गरेको उनको जिकिर छ।
जर्मनीबाट जलवायु परिवर्तनमा विद्यावारिधि गरेका इनम भारत, जर्मनी र अमेरिकामा बस्दै आएका थिए।
इनमका अनुसार जबराका छोरामार्फत आफू जबरासँग नजिक भएको हो। दुवै ललितपुरको हात्तीवनस्थित लिटिल एन्जेल्स स्कुलमा पढेका थिए। जबराले आफूलाई राजनीतिक गतिविधिमा जोडिन र कांग्रेसका नेताहरूसँग नजिक हुन भनेको उनको भनाइ छ।
दीपक भट्टसँग जबराले नै आफूलाई जोडिदिएको इनमको दाबी छ। जबराले भने अनुसार पूर्वमन्त्री दिपक खड्काले भट्टसँग भेट गराएको उनले बताएका छन्।
यसैबीच कांग्रेसका पूर्वकोषाध्यक्ष उमेश श्रेष्ठसँग जग्गाको विषयमा इनमको कुरा भएको ह्वाट्सएप सन्देश फेला परेको छ। श्रेष्ठले लालपुर्जाको फोटो सेयर गरेका थिए। श्रेष्ठको जग्गा आफ्ना नाममा लिने प्रक्रिया अघि बढेको इनमले बताएका छन्।
