काभ्रेपलाञ्चोक — निरन्तर परेको वर्षाले काभ्रेपलाञ्चोकको बेथानचोक गाउँपालिका–४ खहरे खोलामा ग्राभेलसहितको लेदो माटो बगाएको छ। बगेर आएको लेदोले स्थानीय शेरबहादुर तामाङको घर पूर्ण रूपमा पुरेको छ भने अन्य दुई घरमा पनि क्षति पुगेको छ।
ढुङ्गा र माटोले बनेको जस्ताको छाना भएको एकतले घर लेदोमुनि परेको छ। अहिले घरको जस्तापाता मात्र देखिने अवस्थामा रहेको प्रहरीले जनाएको छ।
तामाङको घर नजिकै रहेको तीनतले घरमा पनि लेदो मिसिएको पानी पसेको छ। त्यस्तै, सोही स्थानका हर्कबहादुर तामाङको तीनतले घरमा समेत पानी पसेको छ। उनको घर नजिकै रहेको जस्तापाता र काठले बनेको गोठ भने पूर्ण रूपमा क्षति भएको छ।
घटनाको जानकारी पाउनासाथ प्रहरी चौकी खोपासीबाट प्रहरी टोली घटनास्थलमा पुगेको थियो। प्रहरीले दुवै परिवारका १६ जना सदस्यलाई सुरक्षित स्थानमा रहेका आफन्तको घरमा स्थानान्तरण गरेको छ।
क्षतिको थप विवरण संकलन भइरहेको प्रहरीले जनाएको छ। लगातारको वर्षाका कारण जिल्लाका विभिन्न स्थानमा जोखिम बढेकाले प्रभावित क्षेत्रका बासिन्दालाई सतर्क रहन आग्रह गरिएको छ।
वर्षा अझै जारी रहेकाले खोलानाला आसपासका बस्तीमा थप क्षति हुन सक्ने भन्दै स्थानीय तह र प्रहरीले अवस्थाबारे निगरानी गरिरहेको जनाएका छन्।
