बाजुरा । भारी हिमपातपछि बाजुराको धार्मिक तथा पर्यटकीय क्षेत्र बडीमालिकामा पुगेका दुई जना पर्यटक सम्पर्कविहीन भएका छन् । बडीमालिका माताको दर्शन गर्न गएका उनीहरू हिउँ परेपछि फर्कन नसकेर अलपत्र परेको हुनसक्ने प्रहरीले जनाएको छ ।
जिल्ला प्रहरी कार्यालयका सूचना अधिकारी एवं प्रहरी निरीक्षक नरेशबहादुर शाहीका अनुसार सम्पर्कविहीन हुनेमा कञ्चनपुरको बेदकोट नगरपालिकाको दैजी घर भएका २० वर्षीय मनिष बोहरा र कृष्णपुर नगरपालिका–२ का २१ वर्षीय सागर कार्की रहेका छन् । कात्तिक ९ गते सदरमुकाम मार्तडीबाट पाँच जनाको टोली बडीमालिका गएकामा तीन जना भने फर्किसकेका छन् ।
चार हजार दुई मिटर उचाइमा रहेको बडीमालिका भगवती मन्दिरको दर्शन गरेर फर्कने क्रममा मनिष शुक्रबारदेखि सम्पर्कविहीन भएका हुन् । सागरसँग गए रातिदेखि सम्पर्क हुन सकेको छैन । यसअघि फोन सम्पर्कमा सागरले साथी हराएको र आफू त्रिवेणी पाटनमा रहेको बताएका थिए ।
दुवै जनाको मोबाइल बन्द भएको संकेत आएपछि प्रहरीले मार्तडीबाट उद्धार टोली पठाउने तयारी गरिरहेको छ । शुक्रबारदेखि जिल्लामा परेको वर्षासँगै उच्च हिमाली क्षेत्रमा हिमपात भएकाले उद्धारमा कठिनाइ भइरहेको प्रहरीले जनाएको छ ।
