प्रधानमन्त्री बालेन शाहले नेपालमै विश्वस्तरका युनिकर्न कम्पनी बनाउने वातावरण तयार पार्न नीतिगत सुधार गरिने बताएका छन्। शनिबार सामाजिक सञ्जालमार्फत उनले गेम विकास तथा सूचना प्रविधि उद्योगलाई प्रोत्साहन गर्ने प्रतिबद्धता जनाएका हुन्।
उनका अनुसार त्यसका लागि आवश्यक नियम र समग्र वातावरणको पुनरावलोकन गरिनेछ। नेपाली कम्पनीहरूले विश्व बजारमा प्रतिस्पर्धा गर्न सक्ने गरी सहज वातावरण निर्माण गर्ने उनको भनाइ छ।
प्रधानमन्त्रीले नेपालीले बनाएका गेमिङ एपले विश्वभर नाम कमाइसकेको उल्लेख गरे। करिब २० करोड पटक डाउनलोड भएको लुडो र १५ करोडभन्दा बढी पटक डाउनलोड भएको कलब्रेक नेपालीकै सिर्जना भएको उनले बताए। सयौँ युवाहरू अहिले गेम एप बनाउन लागिपरेका छन्।
गेम विकासकर्तालाई बोलाएर उनीहरूका समस्या बुझिएको र यो क्षेत्रलाई सजिलो बनाउँदै उद्योगका रूपमा अघि बढाउने विषयमा छलफल भएको प्रधानमन्त्रीले लेखेका छन्। उनीहरूका समस्या समाधानका लागि गृहकार्य थालिएको उनको भनाइ छ।
सूचना प्रविधिका उत्पादन र निर्यात अहिले निकै सकारात्मक अवस्थामा रहेको उनले बताए। दक्ष जनशक्ति र कम्पनीले सहजै आम्दानी गर्न र पुनः लगानी गर्न सकून् भन्ने ध्यानमा राखेर करमा सहजता, नीतिगत सुधार र अन्तर्राष्ट्रिय आम्दानीसम्बन्धी नियम खुकुलो पारिने उनको भनाइ छ।
गेम जाम, स्टार्टअप कार्यक्रम, ह्याकाथोन तथा नेपाल राष्ट्र बैंक र अर्थ मन्त्रालयसँग नियमित अन्तरक्रिया गरेर सूचना प्रविधि तथा गेमिङ उद्योगलाई फाइदा पुग्ने गरी इकोसिस्टममा लगानी गरिने प्रधानमन्त्रीले बताए।
